⚜️భువి ధర్మమూర్తి యైన
శ్రీరాముడే రక్షకుడు
సమస్త మానవాళికి!
శరణు శ్రీరామ రక్ష!
⚜️స్థావర జంగమమగు
జగతికి రక్షకుడు
కోదండ పాణి, రామయ్య!
శరణు శ్రీరామ రక్ష!
[ అష్టాక్షరీ గీతి, శంకర ప్రియ.,]
🌻శ్రీరాముడు.. మర్యాద పురుషోత్తముడు! మూర్తీభవించిన ధర్మము కలవాడు!అందరికీ ఆత్మ బంధువు! అభిమాన దైవము.. శ్రీరామచంద్ర పరబ్రహ్మము!
🪷లోకంలో మహాత్ములందరు.. ధర్మాత్ములే! వారు.. అనుదినం ధర్మ మార్గమును అనుసరిస్తారు! యధార్థమైన వాక్కులను మాట్లాడుతారు! సమస్త ప్రాణికోటికి మంచిని కోరుకుంటారు! అహింస, సత్యము, ధర్మము, శాంతి.. మున్నగు సద్గుణములతో ప్రకాశించుతారు!
⚜️అందరినీ ప్రేమించి, నిష్కళంకమైన ప్రేమను పంచిపెడతారు! అటువంటి మహానుభావులను,, ఈ చరాచర ప్రపంచమును.. కంటికి రెప్పలా కాపాడుచున్నాడు... సర్వ జగద్రక్షకుడైన శ్రీరామ భద్రుడు!
శుభం భూయాత్!
🚩సీస పద్యము
ధర్మ మార్గమ్మునే తలచుచు మెలగిన
ప్రజలకు అదియె "శ్రీరామరక్ష"
సత్య వాక్యమ్మునే సర్వదా పలికిన
ప్రజలకు అదియె "శ్రీరామరక్ష"
సర్వభూత హితమ్మె సతతమ్ము కోరిన
ప్రజలకు అదియె "శ్రీరామరక్ష"
సుగుణాలతో గూడి శోభిల్లు చుండిన
ప్రజలకు అదియె "శ్రీరామరక్ష"
🚩తేట గీతి పద్యం
ప్రేమతోనున్న అదియె "శ్రీరామరక్ష"
అటుల "సర్వ జగద్రక్ష"యగు నటంచు
ఆచరించిన జయముల నందగలము!
భద్రముల నిత్య శుభముల బడయ గలము!
[ రచన:- కోట రాజశేఖర్., అష్టావధాని.,]
🕉️ శ్రీరామ! జయ శ్రీరామ! జయజయ శ్రీరామ!;
addComments
కామెంట్‌ను పోస్ట్ చేయండి