త్యాగం- (బాలగేయం)-మమత ఐలకరీంనగర్-9247593432

పెళ్లి నగలకై బోయి పరుష రాముడు 

బకాసురునికి జిక్కుకునె నికాలస్సుగా

కమ్మనైన ఆహారం నిమ్మలంబుగా

కుడువబోగ నడిమికచ్చి పండు వృద్ధుడు

బ్రతికి యోజనము లేని బడుగు నేనని

నన్ను తిను నీయాకలి తీరుతుందనె

అంతటొక్క వృద్ధురాలు అడ్డంవచ్చి

భక్షించుము నన్ననుచు బ్రతిమిలాడెను

వారి జాడకై వచ్చిన పడుచు యువకుడు

వద్దు వద్దు వారిని విడి నన్ను తినమనె

అంతలోనె ఒక యువతి ఆగుము అనుచు

ముందుకచ్చి వృత్తాంతం చెప్పసాగెను

నా పెళ్లి నగల కొరకు నాయన వచ్చి

నీకు జిక్క వీరంత వెదక వచ్చిరి

మూలకారణం నేనని ముందుకురాగ

వంటలతో తల్లి వచ్చి వాదులాడెను

నేనంటే నేననెడి త్యాగ నడవడి 

బకాసురుడి గుణమంత మార్చివేసెను

ఇంటిల్లు మేలుగోరి మోదము తోడ

పిడికెడన్నమే చాలని విడెచె వారిని