శ్రీ విష్ణు సహస్రనామాలు (బాల పంచపది )-ఎం. వి. ఉమాదేవి

706)సన్నివాసః -

సజ్జనులకు నిలయమైనవాడు 

సాధుజనుల కాశ్రయమిడువాడు 

సత్ కర్మలకు మూలమైనవాడు 

చక్కని నివాసంగా యున్నవాడు 

శ్రీవిష్ణు సహస్రనామాలు ఉమా!

707)సుయామునః -

యమునా తీరమున యున్నవాడు 

గోపికలతోటి పరివేష్టితుడు

శ్రీ కృష్ణ అవతారం నందున్నవాడు 

రేపల్లె వాసులకు నాయకుడు 

శ్రీవిష్ణు సహస్రనామాలు ఉమా!

708)భూతవాసః -

సర్వభూతాలకునూ నిలయుడు 

ప్రాణి సమూహం తనలోనున్నవాడు 

చరాచరములు నింపుకున్నవాడు 

జగత్తునకు పర్యవేక్షకుడు 

శ్రీ విష్ణు సహస్రనామాలు ఉమా!

709)వాసుదేవః -

మాయాశక్తిచే నిండియున్నవాడు 

సర్వం ఆవరించియున్నవాడు 

భౌతికముగా మార్మికుడైనవాడు 

వాసుదేవ నామమున్న వాడు 

శ్రీ విష్ణు సహస్రనామాలు ఉమా!

710)సర్వా సునిలయః -

సర్వమూ నిలిపియున్నవాడు 

సమస్తజీవులకునూ నిలయుడు 

భక్తులకు ఆశ్రయమునిచ్చువాడు 

సునిలయము అయినట్టివాడు 

శ్రీవిష్ణు సహస్రనామాలు ఉమా!

(సశేషం )