బ్రహ్మానందానుభూతి;-సి.హెచ్.ప్రతాప్

 ఒక వ్యక్తి తన స్వప్నావస్థలో కలలు కంటాడు. కలలో ఒక అందమైన ప్రపంచం చూస్తాడు.  కలలో చూసిందంతా కలకంటున్నంత సేపు అతని విషయంలో యథార్థంగానే వుంటుంది. కాని అతడు నిద్రనుండి మేల్కొనగానే కల అంతా మిధ్య అని తెలిసికుంటాడు.  మనం జ్ఞానులమై బ్రహ్మానందానుభూతిని పొందేవరకు ఈ దృశ్యమాన ప్రపంచం అంతా మనకు వాస్తవమే అవుతుంది. కాని మనకు బ్రహ్మానందానుభూతి కల్గిన మరుక్షణం ఈ ప్రపంచమంతా మిధ్య అవుతుంది. ఇక్కడ ప్రపంచం వ్యావహారిక సత్యం, పరబ్రహ్మ పారమార్థిక సత్యంగా మనం తెలుసుకోవాలి. కాబట్టి బ్రహ్మానందానుభూతుయే నిజమైన మరియు శాస్వతమైన అనుభూతి అని అర్ధం చేసుకోవాలి.మనసంటే అహం వృత్తే గనుక దాని పుట్టుక స్థానాన్ని వెతికితే అది పడిపోతుందని భగవాన్ రమణ మహర్షి చెప్పారు. అహం వృత్తి పడిపోయిన చోట నిజమైన ‘నేను’.. అంటే ఆత్మ స్వయంవ్యక్తమవుతుందని తెలియజేశారు. అదే ఆత్మ నిష్ఠ, అదే ఆత్మ సాక్షాత్కారం, అదే బంధముక్తులకు అతీతమైన బ్రహ్మానందానుభూతి అని తెలియజేశారు.అపరిపక్వబుద్ధులైన మానవులు భగవానుని సర్వవ్యాపకమైన పవిత్రతను పొందలేకున్నారు’’. అగ్నితప్తమై పరిశుద్ధమైనదే బంగారం. అదే విధంగా తపస్సు అనే అగ్నిలో తపింపబడకుంటె ఆ మనిషి భగవత్ప్రాప్తిని ఎలా పొందగలడు? పచ్చికుండలో నీరు నిలవదు. నీరు నిలవాలంటె కుండ కాల్చబడాలి. అదే విధంగా భగవదనుభూతిని పొందాలంటె శరీరం తపింపబడాలి. అలా తపస్సుచేత పరిశుద్ధమూ, పరిపక్వతనూ పొందిన ఆత్మ బ్రహ్మానందానుభూతిని పొందేందుకు అర్హవౌతుంది.సత్యమైన బ్రహ్మాన్ని తెలుసుకొని, బ్రహ్మం చేతిలో నేను సాధనాన్నే కాని నాదీ అనే అహంకారంతో వ్యక్తిత్వంతో నిలవగలిగింది ఏదీ లేదు అని అర్థం చేసుకొని మానవుడు జీవించటాన్నే జ్ఞానం అంటారు. అదే బ్రహ్మజ్ఞానం. అదే భగవత్తత్త్వం. ఆ భగవత్తత్త్వం తెలిసిననాడు మానవుడు విషయవాంఛలకు లోనుకాకుండా బ్రహ్మానందానుభూతిని పొంద గలుగుతాడు.
:అందరును భగవదనుగ్రహమునకు పాత్రులే. ప్రతివాని హృదయమునందును సత్యమను రాయి (సుస్థిరమైనది) యున్నది. ఆ రాతి ననుసరించి, ప్రేమ యను ఊట బుగ్గ లేక చెలమ యున్నది. ఆ ప్రేమయే దైవము. ఆ సత్యమే దైవము. దైవత్వము, లేక దైవ భావము ప్రతివాని యంతరంగములో నిమిడి యున్నది. అనగా ప్రయత్నముచేత గాని, ఆ దైవత్వమును, లేక దైవభావము వెలుపలికి రాదు (ప్రకాశింపదు). సాధన వలన బైటికి వచ్చి ప్రకాశించును. భూగర్భములోని నీటి యూటను త్రవ్వి త్రవ్వి బైటకి దెచ్చునట్లు, నిరంతర రామనామ స్మరణవలన నంతరంగము త్రవ్వినట్లు కాగా, దైవత్వమను ఊట బైట పడును. బ్రహ్మానందానుభూతి ప్రకాశించును. ఇట్టి బ్రహ్మానుభూతి నుండి, లేక పరమాత్మానుగ్రహమును సంపూర్ణముగా పొందిన భక్తుని నుండి ప్రారంభదశలోని సాధకులు సహాయమును పొందుదురు" అని శ్రీ సత్యసాయి భగవాన్ తమ బోధల ద్వారా అద్భుతంగా తెలియజేసారు.