సామెతల ఊట -సునందమ్మ నోట: - వురిమళ్ల (భోగోజు) సునందా ఉపేందర్ రావు ఖమ్మం

 సామెత -281: ఇంటిపేరు కస్తూరి వారు ఇల్లంత గబ్బిలాల కంపు అన్నట్లు
**
"ఏందోనే అవ్వా! కొన్ని బలే గమ్మత్తుగుంటయ్. కొందర్కి అమ్మ నాయినలు పెట్టే పేర్లకి గాళ్ళు జేసే శకలకి సస్రం ఫరకుంటది.గవి సూత్తుంటె నవ్వొత్తది.కోపమొత్తది.అయ్యో పాపమనిపిత్తది. గీ పెద్దోళ్ళు పేర్లు గట్లెందుకు పెడ్తరో ఏమోనే?"
"గదేందిరా అయ్యా! ఎన్నల్లేంది పేర్లమీద, పెద్దోళ్ళ మీద బడ్డవు. ఎవలైన సరె గాళ్ళ కడ్పున బుట్టిన సంతానం మందిల మంచి పేరు తెచ్చుకోవాలనే గద సూశేది. గాళ్ళు మంచోళ్ళైతరో శెబరోళ్ళైతరో  పెద్దైనంక గద తెల్శేది.మన పక్కింటి కొండయ్య కొడుకు బక్కయ్య.కొండయ్య సూత్తెనేమో  దబ్బనంతో గుచ్చితే అటీటు దిగేంత బాక్కగుంటడు. ఇంగ గాయిన కొడుకు బక్కయ్య బీముని లెక్క దుబ్బుకు దుబ్బే వుంటడు.గాడు శిన్నప్పుడు సోవిడి సోకి బాక్కగుండేటోడు. గంద్కనే గా పేరు వెట్టుకుర్రు.గిప్పుడు సూడు ఆడెట్లున్నడో."
" సూర్యకాంతం అనగానే గామె లెక్క గా పేరు బెట్టుకున్న అందరు గయ్యాళులు అయితరా ఏంది?"
"గంతేనంటవా అవ్వా! నువ్వు జెప్పినట్టు నా దోత్తుగాని పేరు రాజు. గని ఏం లాభం. గానంత పేదోడు ఇంకోడు లేడంటే నమ్ము. గాన్ని శిన్నప్పటి సంది సూత్తున్న. గాని వొయిసు పెర్గింది గని గాడెన్నడన్న సుఖంగ బత్కిండ శెప్పవ్వా!? "
" అవున్రా వారీ! గట్ల పేర్లకీ మన్సులకి లంకె కుదర్దు గాక కుదర్దు.నేను సూత్తున్న గద. ఏంటో గీ యచ్చింత్రాలు. అవున్రా వారీ గియ్యాల గీ యిష్యం ఎందుకు యాదికొచ్చింది ?
 "గదేనవ్వా  గీ నడ్మల మన సొతంత్రం తాత అగుపిచ్చిండు. గాయిన్ని సూత్తే మస్తు బాదన్పిచ్చింది. గాయిన పేరుకి గాయిన బతుక్కి ఏవన్న కల్శిందా? పేర్ల సొతంత్రం దప్ప బత్కుల లేదాయే ముసలోడయ్యే దనుక మనూరి దొర తాన ఎట్టి శాకిరి సేశిండా? గాయిన పిల్లలు ఎద్గినంకైన సొతంత్రం వొచ్చిందా అంటే గదీ లేదాయె. కోడండ్లు బెట్టింది తినాలె.నోర్మూస్కొని వుండాల్నాయె.పాపమనిపిత్తదవ్వా!"
"అవున్రా వారీ! బుద్ధికి తగ్గట్టు పేరు.పేరుకు దగ్గట్టు బుద్ధి ఏ కొద్దిమంది మగానుబావులకో వుంటది.కొందర్ని సూత్తే సత్తానికి నిల్వెత్తు సాచ్చాలు.శీరామ శందురుని పేరు.గట్లనే గా మడిషి తీరు ఉన్నప్పుడు ఎంతదృట్టం అన్పిత్తది."
"అవ్వా! మొన్న! నా దోత్తు మారాజు పట్నంల కలిశిండు.గాన్ని సూత్తుంటే శిన్నప్పుడు టిప్పుటాపుగ ఉండేటోడు.గిప్పుడు సూత్తె పరేషానైతం అవ్వా!"
 ఓ గాడేనారా గా కత్తూరోల్ల అబ్బాయి?"
 "అవునవ్వా!  గాళ్ళ ఇంటి పేరు కస్తూరి వారు.గట్లని శిన్నప్పుడు శెడ్డీలేస్కున్న వొయిసులో గాల్లింటికెల్తే గవులు ఆసనొచ్చేది.ఇంటినిండ యిడిశిన గుడ్డలు. తిన్న బోళ్ళు బొచ్చెల మీద జుబ్బున ఈగలు ఆలుడు. గయి సూశి నాకు శానా త్యేపల డోకే వొచ్చేదవ్వా! గది యాదికొచ్చింది.గిప్పుడన్న  గాళ్ళు మారిండ్రో? లేదో?"
"గస్మంటోళ్ళని సూశే" ఇంటి పేరు కత్తూరి వారు ఇల్లంత గబ్బిలాల కంపు " అని పేరొచ్చిందిరా అయ్యా!"
"గదే అవ్వా! ఇంటి పేర్లకీ,వొంటి పెర్లకీ గా గుణాలకి అస్సలు కల్వదు.ఎవలన్న  ఏ  పేరు వెట్టుకున్నా గొప్పోళ్ళయితరు సూడు.గస్మంటోళ్ళ వల్ల గా పేర్లకే పేరు వత్తది గదవ్వా!"
"అవున్రా వారీ!"
గదండీ సంగతి" "ఇంటి పేరు కస్తూరి వారు ఇల్లంతా గబ్బిలాల కంపు" అంటే గిదే మరి.