సినీ రంగంలో కథానాయకునిగా ప్రవేశించి జీవితాంతం చిన్నచిన్న వేషాలతోనైనా సరే తన జీవితాన్ని సినీరంగానికి అంకితం చేసిన మహానటుడు చిత్తూరు వి.నాగయ్య గారు. ఆయన నటించని పాత్ర లేదు ప్రతి పాత్రలోనూ జీవిస్తూ అనేక లక్షల మందికి ఆదర్శప్రాయంగా నిలిచిన అద్భుత నట శిఖామణి. వారి తరువాత వచ్చిన సిహెచ్ నారాయణ రావు గారు కథానాయకునిగా ప్రవేశించి అనేక సినిమాలలో నాగయ్యగారితో నీవానేనా అనట్లుగా నటించి తెలుగు, కన్నడ సినీ రంగాల్లో మంచి పేరు తెచ్చుకున్న నటుడు. రేడియోలో నాతోనూ, శ్రీ గోపాల్ తోనూ చక్కటి పరిచయం ఉంది. వారు విజయవాడ వచ్చినప్పుడు మా దగ్గరికి రావడం మేము మద్రాసు వెళ్లినప్పుడు వారి ఇంటికి వెళ్లడం ఆనవాయితీగా మారింది ఆనాటి కథానాయికలు రుక్మిణి కోయంబత్తూర్ సోదరీమణులతో (లలిత, పద్మిని, రాగిని) పాటు జెమినీ వారి జీవితం చిత్రంలో వైజయంతి మాలతో కూడా నటించిన మహానటుడు. వ్యక్తిగతంగా నాకు కుటుంబ సభ్యుల సాన్నిహిత్యం ఉంది. దానికి గుర్తుగా వారి అబ్బాయికి నా శ్రీమతి పేరు అరుణ కనుక అది వారి అబ్బాయి కి అరుణ్ కుమార్ అని పేరు కూడా పెట్టుకున్నారు. ఇంత సహజ నటుడు దొరకడమే మా అదృష్టం అని జెమిని వాసన్ గారు పత్రికా ముఖంగా వెల్లడించారు. చలం గారు రచించిన నవలలో గొప్ప నవల మార్తా మా శ్రీ గోపాల్ దానిని గంట నాటకంగా వ్రాయించి దానిలో ప్రధాన పాత్రకు సిహెచ్ నారాయణ రావు గారిని కలిసి ప్రధాన పాత్ర నిర్వహించాలని చెబితే ఆయన అంగీకరించి విజయవాడ వచ్చి మూడు రోజులు సాధన చేసి 40 మంది నటీనటులతో రికార్డ్ చేశాం. తెల్లవార్లూ రికార్డింగ్ జరిగినా నారాయణ రావు గారు ఎక్కడా విసుగు లేకుండా చేశారు అలాంటి ఘటనలు చాలా అరుదు. నేను శ్రీ గోపాల్ రమణ మహర్షి జీవితాన్ని తెలుసుకొని శ్రీ భగవాన్ రూపకాన్ని రచించి జాతీయ బహుమతులకు పంపించాలని నిర్ణయించుకొని మద్రాస్ వెళ్లి నారాయణ రావు గారిని తీసుకొని తిరువన్నామలై లో అంతా తమిళం మాట్లాడుతూ ఉంటారని వీరిని దుబాసీగా తీసుకెళ్లాం. తీరా అక్కడికి వెళితే అంతా తెలుగులోనే మాట్లాడుతున్నారు. మూడు రోజుల వ్యవధిలో నాకు కావాల్సిన విషయ సేకరణ చేసి దైవ దర్శనం చేసుకుని కృష్ణ బిక్షు మిస్సెస్ తల్యార్ ఖాన్ ఎదురుగా ఉన్న చలం గారిని, సౌరిస్ గారిని కలిసి అనేక విషయాలు మాట్లాడుకున్నాం. ఆ మూడు రోజుల్లో నారాయణ రావు గారి జీవితం లో జరిగిన అనేక సంఘటనలను సంభాషణ రూపంలో రికార్డు చేశాను. ఆ మహానటునితో నేను దిగిన ఛాయాచిత్రం.
సహజ నటుడు సిహెచ్ నారాయణ రావు;-ఏ.బి ఆనంద్,ఆకాశవణి,విజయవాడ కేంద్రం,9492811322
addComments
కామెంట్ను పోస్ట్ చేయండి