జంధ్యాల;-ఏ.బి ఆనంద్, ఆకాశవాణి,విజయవాడ కేంద్రం.9492811322

 జంధ్యాల మాకు చాలా దగ్గర స్నేహితుడు. కాలేజీలో నాకు జూనియర్ నా నాటకాల్లో  నటించాడు. తను, సుత్తి వీరభద్ర రావు, విజయ రామ్ వీళ్లంతా కలిసి చదివేవారు.  ఫిలిప్స్ డీలర్ నారాయణ మూర్తి గారి అబ్బాయి  కళాశాల విద్య పూర్తయిన తర్వాత తను వ్యాపారం మొదలు పెట్టాడు. తండ్రిని మించిన మెళకువలతో  వ్యాపారాన్ని బాగా పెంచాడు. 
జంధ్యాల మద్రాసు వెళ్లి తన బృందంతో మొదట్లో  చక్కటి నాటకాన్ని ప్రదర్శించినప్పుడు  దానిని దర్శకులు విశ్వనాథ్ గారు చూశారు. అతనిలో ఉన్న ప్రతిభను గుర్తించి తాను పిలిచి తన సినిమాలకు మాటలు రాయించుకున్నారు. ఆత్రేయ గారితో కలిసి నీవానేనా అనేటట్టుగా  చక్కటి సంభాషణలను  మనసుకు పట్టే విధంగా వ్రాశాడు. అది గమనించి విశ్వనాథ్ గారు  తన సినిమాలో మాటలు ఆచార్య ఆత్రేయ జంధ్యాల అని ప్రకటించాడు. తరువాత తనదైన శైలిలో నాలుగు స్తంభాలాట సినిమాను కొత్త నటీనటులతో చెయ్యడం చూసి అనేకమంది నిర్మాతలు  దర్శకత్వ బాధ్యతలు  అప్పగించారు. చివరకు  రామానాయుడు గారు కూడా  తమ సంస్థలో నిర్మాణం ఏర్పాటు చేసుకున్నారు. ఎంతో ఒదిగి ఉండే జంధ్యాల అందరి మనసులను దోచుకున్న వాడు  పాతవారిని మర్చిపోకుండా  అందరికీ తన సినిమాలలో వేషాలు ఇచ్చి ప్రోత్సహించారు. అలాంటి వాడిని మేమంతా శాస్త్రి అని పిలుస్తాం. ఎంత పెరిగినా అంత ఒదిగి ఉండాలి అన్నది అతనిని చూస్తే తెలుస్తుంది. అతను నాటకాలు వ్రాసి నాటక పరిషత్తుకు  తీసుకు వచ్చినప్పుడు చాలా సార్లు నేను నండూరి సుబ్బారావు గారు  న్యాయనిర్ణేతలుగా వెళ్ళేవాళ్ళం. అతనికి బహుమతి రాకపోయినా మాట్లాడేవారు కాదు ఆ తెల్లవారి మా కేంద్రానికి వచ్చి  ఆనంద్ గారూ నా నాటకంలో  ఏమైనా తప్పులు ఉన్నాయా  ఉంటే చెప్పండి వాటిని సరి చేసి తరువాత ప్రదర్శనలో మార్చుకుంటాను అని సౌమ్యంగా అడిగేవారు. మేము చెప్పిన దానిని అంగీకరించి దానిని సరి చేసుకునే వాడు కూడా. ఒకరోజు ఆయనతోపాటు నిర్మాత కృష్ణంరాజు గారిని వారి సినిమాలో కొత్తగా జంధ్యాల పరిచయం చేస్తున్న కవితను తీసుకువచ్చి మాకు పాదాభివందనం చేసి ఆనంద్ గారు, సుబ్బారావు గారు, రామ్మోహన్ రావు గారు లేకపోతే నేను ఇంత స్థితికి వచ్చి ఉండేవాణ్ణి కాదు కవితా నువ్వు కూడా వారికి పాదాభివందనం చెయ్ నాలుగు అక్షరం ముక్కలు తెలుస్తాయి అని ప్రోత్సహించాడు. మీకు  వీలుంటే తప్పకుండా వేషాలు ఇస్తాను రమ్మని ఆహ్వానించాడు. సుబ్బారావు గారు, రామ్మోహన్ రావు గారు వెళ్లారు కానీ నేను వెళ్ళలేదు. మీరెందుకు రావడం లేదు అన్నాడు జంధ్యాల నాకు సినిమాలంటే అంత మక్కువ లేదు. నేను ఆకాశవాణినే  నమ్ముకున్నాను నా జీవితం ఆకాశవాణికే  అంకితం అని చెప్తే ఎంతో మురిసి పోయాడు. సినీరంగ ప్రవేశం జరిగిన సందర్భంగా ఉషశ్రీ గారు, శ్రీనివాసన్ గారు ఆకాశవాణికి పిలిచి సన్మానం చేశారు ఇది ఆ చిత్రం.

.