చాతకం! అచ్యుతుని రాజ్యశ్రీ

 టీచర్ పాఠం చెప్తూ చాతకపక్షిగూర్చి వివరించింది.ఆపక్షి ఎట్టిపరిస్థితులలోనూ నేలపై పడిన నీరు తాగదు.వర్షపు నీటిచుక్కలకై నోరు తెరిచి కూచుంటుంది.అలాగే మనంకూడా మన మంచి అలవాట్లు వదలరాదు.ఆరోజు బడికి వెళ్తూ శివా ఇదే ఆలోచిస్తున్నాడు.ఇంతలోఒక వ్యక్తి సైకిల్ వెనకాల చిన్న చిన్న మూటలు పెట్టి వెళ్లుతున్నాడు.బక్కగా ఉన్న అతను అతి కష్టం పై తొక్కుతున్నాడు.రోడ్ అంతా ఎగుడుదిగుడుగా ఉంది. సైకిల్ వెనకాల ఉన్న కూరలమూట కింద పడింది. అతను అది గమనించలేదు. రోడ్ పై పోతున్న వారు కనీసం అతన్ని పిలిచే ప్రయత్నమే చేయలేదు.బడిలో ఫస్ట్ పీరియడ్ లెక్కల పరీక్ష.ఆలస్యంగా వెళ్లితే బైట నించోపెడతారు.ఐనా శివా "అంకుల్!బాబాయ్!కూరలమూట జారి కింద పడింది. ఆగండి " అని అరుస్తూ దాన్ని తీసుకుని పరుగులు పెట్టాడు. ఖంగారులోసైకిల్ అదుపుతప్పి ఆవ్యక్తి కింద పడ్డాడు. శివా గబగబా పరుగెత్తి  అతన్ని లేపాడు.కాళ్ళు చేతులు గీరుకుపోయాయి అతనికి. తన చేతి దస్తీతో తుడిచి తన దగ్గర ఉన్న బాటిల్ లోని మంచి నీరు తాగించాడు."బాబూ!నేను సైకిల్ తొక్కలేను.కాస్త మాఇంటి ముందు దింపు" దీనంగా అడిగాడు. ఇంకోరి సాయంతో  సైకిల్ వెనకాల అతన్ని కూచోపెట్టి నెమ్మదిగా తొక్కుతూ ఆగల్లీ చివర ఉన్న అతని ఇంట్లో దింపాడు.ఇదంతా అయ్యేటప్పటికి ఫస్ట్ పీరియడ్ పరీక్ష ఐపోయింది.జరిగింది అంతా హెచ్.ఎం.కి చెప్పితే ఆయన శివా ని మెచ్చుకుంటూ "పరీక్షమళ్లీ రాయవచ్చు. కానీ ఓమనిషికి సాయం చేశావు.నీపరోపకారబుద్ధి మెచ్చతగింది" అని కొత్త పెన్ను తనజేబులోంచి తీసి శివా కి ఇచ్చారు 🌹