సుప్రభాత కవిత ; -బృంద

కడలి లోతు కనుగొనగలమా!

మనసు అంతు తెలియగలమా!

జీవితచక్ర గమనంలో

తలచే వెన్నో??  గెలిచేదెన్నో?!

మారుమూల మమతలన్ని

మాటువేసి ఉంటాయి...

అపురూపంగా ఆల్చిప్పల పెట్టెల్లో

సముద్రగర్భాన  ఆణిముత్యాల్లా!

మనసనే కడలి అడుగున

నిక్షిప్తమై  ఉన్న  జ్ఞాపకాలు

ఏ కదలిక కు పైకొస్తాయో!

ఏ బీడును తడిపేస్తాయో?!

ఏ రాతిలో ఏ జీవం

ప్రాణం పోసుకుంటుందో

ఎంతకాలం ఎదుగుతుందో

రాతిలోని చెమ్మకే తెలుసు.

ఏ మదిని  ఏ మనసు కదిలిస్తుందో....

ఏ మమత  నారుపోసుకుంటుందో

ఏ బంధం ముడిపడుతుందో.

ఆ మమతకు మాత్రమే తెలుసు

ఏ రోజు  మనకోసం

కొత్తగా ఏ వైపు నుండీ

ఏం మోసుకొస్తోందో

ఏ మార్పు నిస్తుందో!

తెలియని తాయిలం  తెచ్చే

ఉదయానికి

🌸🌸 సుప్రభాతం 🌸🌸