నా బాల్యం నాకళ్ళముందావిష్కృతమైంది:- అంకాల సోమయ్య-దేవరుప్పుల-జనగామ-9640748497

అమ్మెందుకో

తప్పటడుగులు వేస్తుంది

మళ్లీ బాల్యంలోకి

తానెళ్ళినట్టు

గోడలు పట్టుకొని నడుస్తున్న మనల్ని

తనచేయిపట్టి 

నడిపించిన అమ్మ

జవసత్తువలుడిగి

తనుగన్నకొడుకు

ఆసరా చేసుకొని

ఒక్కొక్క అడుగేస్తుంది

అమ్మ ఇప్పుడు తనబాధను

ఆవేదనను ఏమాత్రం వ్యక్తీకరించలేని

ఆశక్తురాలుగా ఉంది

పళ్ళూడిన నోటితో 

ఏమేమో గొణుగుతుంది

 యాస్టొచ్చి 

కసురుకుంటే

ఏడుపుముఖంపెడుతుంది

కొడుకు తన తల్లిని

గోముగా తలనిమిరి

లాలిస్తుంటే 

ఏడ్వకే ఎందుకిలా చేస్తున్నావు

అంటే

దీనంగా 

కొడుకులవంకేచూస్తుంది

ఇప్పుడు మా అమ్మలో

నా బాల్యం కన్పిస్తుంది

నా  పసితనమంతా

మల్లోక్కసారి

కళ్ళముందు

ఆవిష్కృతమైనట్టుంది