చర్చీ మసీదు
మందిరాలపై స్వేచ్ఛగా విహరించే
శాంతి గీతాలు ఆలపించే
శాంతి కపోతాల రెక్కలు విరిచి
ముక్కలు చేసి రక్తపు మడుగులో
గిలగిలా కొట్టుకుంటూ ఉంటే...
కిలకిలా నవ్వే ఓ కిరాతకులారా..!
ఓ నయ వంచకులారా..!
ఓ నరరూప రాక్షసులారా..!
తెలుసుకోండిరా..!
సత్యం తెలుసుకోండిరా..!!
మిమ్మల్ని పెంచి పోషించే
విషసర్పాలు
విజయగర్వంతో విర్రవీగవచ్చు గానీ
ఇంతటి మానవ మృగాలను
కన్న తల్లీదండ్రుల కంట కారేది
కన్నీటి చుక్కలు కాదు రుధిరధారలే..!
ఓ రాక్షసులారా..!
ఓ రాబందులారా..!
తెలుసుకోండిరా..!
సత్యం తెలుసుకోండిరా..!!
ఆ అందాల కాశ్మీర్ లో
పచ్చటి పహల్గామ్ లో
మినీ స్విట్జర్లాండ్ బైసరిన్ లోయలో
విహరించే అమాయక పర్యాటక పక్షుల
శిరస్సులను ఛిద్రం చేయమని...
రక్తపు మడుగుల్లో ముంచమని...
ప్రాణాలను హరించమని...!
పచ్చని మైదానాన్ని
మరుభూమిగా మార్చమని...
మంచుకొండల్లో మంటలు రేపమని...
ఇంతటి నరమేధం సృష్టించమని...!
మిమ్మల్ని మతోన్మాదంతో రెచ్చగొట్టి...
జీహాద్ పేరుతో జీవహింస చేయమని...
ఏ రాక్షసుడు మీకు శిక్షణ నిచ్చేనురా..?
ఏ మతగ్రంధం దీనిని బోధిస్తుందురా..?
కసితో బుసలు కొట్టే
ఓ కాలసర్పాల్లారా..!
పచ్చని అడవుల్లో నక్కినక్కి తిరిగే
ఓ గుంట నక్కల్లారా..!
ప్రేమకు అర్థం తెలియని
ఓ పిచ్చి కుక్కల్లారా..!
తెలుసుకోండిరా..!
సత్యం తెలుసుకోండిరా..!!
దిక్కులు పిక్కటిల్లిన...
రక్తపుటేరులు పారిన..
ఆ పహల్గామ్ ఉగ్రదాడికి
విశ్వమంతా దిగ్భ్రాంతి చెందే...
భారతీయుల హృదయాలు
శోకసంద్రంలో మునిగిపోయే...
ఎలా భరించాలి ఈ గర్భశోకాన్ని...?
ఔరా! 26 మంది మీ తల్లుల తలలను
మతం పేరిట తమ భర్తల,
తమ పిల్లల కళ్ల ముందరే
తెగనరికితే తట్టుకోగలదా మీ దేశమాత...
అందుకే మిషన్ గన్నులతో విషం గ్రక్కే...
ఓ ఉగ్రవాదులారా..!
ఓ ఉన్మాదులారా..!
తెలుసుకోండిరా..!
సత్యం తెలుసుకోండిరా..!!
గన్నులు పేల్చేవారే
ఆ గన్నులకు బలౌతారని..!
నిన్ను వలె
నీ పొరుగుదేశాన్ని ప్రేమించాలని...
మానవత్వమే మతమని...
దయగల హృదయాలే దైవమందిరాలని...
ఓ మూర్ఖులారా..!
ఓ ముస్కరులారా..!
తెలుసుకోండిరా..!
సత్యం తెలుసుకోండిరా...!!
శవపేటికలను కానుకలుగా పంపేవారు
వాటిని నవ్వుతూ స్వీకరించేవారు
అణు బాంబులతో బెదిరించేవారు
సింధూనదిలో పారేది నీరుకాదు రక్తమని
మత విద్వేషాలను...
రెచ్చగొట్టే మతోన్మాదులు...
రేపు...ఆ శవ పేటికల్లో నిద్రిస్తారని...
అహింసా భారత్ శాంతిని తప్ప
యుద్ధం కోరుకోదని...
కానీ "సమరానికి సై" అంటే
సరిహద్దుల్లో మీకు సమాధులు సిద్దమని...
ఓ మానవ మృగాల్లారా..!
ఓ రక్తం త్రాగే రాక్షసుల్లారా..!
తెలుసుకోండిరా..!
సత్యం తెలుసుకోండిరా..!!
addComments
కామెంట్‌ను పోస్ట్ చేయండి