స్మృతుల పరిమళం:- కాకర్ల రమణయ్య-గుడిపాటిపల్లి-: 9989134834

సాహితీ కవికళా పీఠం 

సాహితీ కెరటాలు 

=============

అమ్మ ఆలంబన

అపురూపమైన ముద్దు.!

నాన్న గుండె చాటు

గుంభన  ప్రేమ..!

కొత్త పుస్తకాల సమ్మోహన

పరిమళం..!

జామెంట్రీ బాక్స్ లో దాచిన 

నిమ్మ బద్ధ పులుపు..!

ఆటస్థలములో జారిపడ్డ

గతాలు..!

నూనూగు మీసాల దొంగ చూపులు...!

విరబూసిన నవ్వులను గంపకు ఎత్తుకున్న దినాలు..!

ఈతలో అడుగు 

మట్టి తెచ్చిన క్షణాలు..!

ముళ్ల కంప లో లేపిన 

జుంటితేనెను చప్పరించిన

మధుర కాలాలు..!

అలజడి రేపిన కలువ కన్నుల

సుందరి..!

మాటల పూబంతులను

రువ్విన మధుర క్షణము..!

తొలి కవితను కలం సిరాలో 

ఓలక బోసిన యవ్వనం..!

తొలి కథను పత్రిక ప్రసవించిన  ప్రౌఢత్వం..!

 భాగస్వామి హృదయం లో 

వేసిన తొలి అడుగు  గుండె

చప్పుడు..!

తొలిచూలు చల్లని కబురు చెవులకు సోకిన

మలయమారుతం..!

తొలిబిడ్డ నవ్వులు

గుండెలలో గుడి కట్టిన నాదం..! 

తొలిజీతం నాన్న ఆశల దోసిలిలో పోసిన దరహాసం..!

ఇవ్వడమే కానీ తీసుకోవడం ఎరుగని అమ్మకు చీర కానుక చిరు గర్వం ..!

ఎన్నెన్ని మధుర స్మృతులు

తవ్వితే ఊరు ఊట బావిలాగా..

త్రాగితే తొలగు దుఃఖ మూలాలు..!