పరమహంస - వినయం: - - యామిజాల జగదీశ్

 శ్రీ రామకృష్ణ పరమహంస కాళికా దేవి భక్తుడు. జీవితంలో ఆయన మాట, చేత, ప్రవర్తన అంతా ఒక చిన్న పిల్లాడిలా ఉండేవి. ఒకసారి కేశవ చంద్ర సేన్ ఆయనను చూడటానికి వెళ్ళారు. ఆయన శ్రీ రామకృష్ణుల కీర్తి ప్రతిష్టల గురించి విన్నవారే.
సంభాషణ మధ్యలో, తాను ఇటీవల ఒక ఆధ్యాత్మిక నాటకాన్ని ప్రదర్శించానని, అందులో ప్రధాన పాత్ర పోషించానని కేశవ చంద్ర సేన్ చెప్పారు. శ్రీ రామకృష్ణులు ప్రశాంతంగా వింటూ ఉండిపోయారు. కేశవ చంద్ర సేన్ శిష్యుడు ఒకరు ఆయనతో పాటే ఉన్నాడు. కేశవ్ తన పాత్రలో చాలా అద్భుతంగా నటించారని, అందరూ ఆయనను ప్రశంసించారని ఆ శిష్యుడు చెప్పాడు. వారు మరొక నాటకాన్ని కూడా ప్రదర్శించడానికి ప్రణాళిక వేస్తున్నారు. శ్రీ రామకృష్ణులకు అందులో నటించాలని ఉందా? ఆయన ఏ పాత్ర పోషించడానికి ఇష్టపడతారు? అని కేశవ చంద్ర సేన్ సరదాగా అడిగారు. 
అయితే శ్రీ రామకృష్ణులు ఒక్క క్షణం కూడా వెనుకాడలేదు. "నేను మీ కాళ్ళ ధూళిగా నటిస్తాను" అని బదులిచ్చారు.
ఈ సమాధానం ఫలితం ఏమిటి? అంతటా అకస్మాత్తుగా ఒక నిశ్శబ్దం, మౌనం ఆవహించాయి. మహానుభావులు తమ వినయం ద్వారా ఇతరులను సైతం వినమ్రులుగా చేస్తారు. మనం మనల్ని ధూళిగా మార్చుకున్నప్పుడు (అహంకారాన్ని వీడినప్పుడు), మన లోపల ఉన్న సూక్ష్మ చైతన్యం మహిమ ను మనం గ్రహించగలుగుతామని స్వామి రామదాస్ ఉవాచ.