భూమికి భుక్తికి నడుమ:- కవిరత్న నాశబోయిన నరసింహ (నాన),ఆరోగ్య పర్యవేక్షకుడు,చిట్యాల,నల్గొండ,9542236764

పంచ భూతాత్మక ప్రకృతిని భక్తితో ఆరాధించడం 

తరతరాల భారతీయ సంప్రదాయం 

వ్యవసాయం ఒక మహా యజ్ఞం 

మానవ జీవనానికి ఆధారం

 

ఉరుముల మెరుపుల తొలకరి జల్లుల ఆగమనం 

పుడమి పరవశంతో పులకరించే ఆనందోత్సవం

అనాదిగా ప్రతీ పని పవిత్ర కార్యంగా తలచి 

శుభ సమయానికై నిరీక్షించే సంప్రదాయం

జ్యేష్ఠ నక్షత్రంతో చంద్రుడు కూడి వుండే శుభ తరుణం 

భూమాతని మొక్కి దుక్కి దున్నడం ఆరంభించే క్షణం      

మట్టిపై విశ్వాసంతో మాణిక్యాలు పండించే

కృషీవలుని చూసీ ఖుషీ ఖుషీగా విరిసే హరివిల్లు

పల్లె గడపలన్నీ పసుపు కుంకుమలతో 

పచ్చని తోరణాలతో కళకళ లాడగ

కాడెడ్లను రంగు రంగులతో అలంకరించి

గణగణ గంటల గజ్జెలతో ముస్తాబు చేసి

బసవన్నలను నందీశ్వరునిగ కొలిచే పర్వం 

కాడిని ధూపదీప నైవేద్యాలతో పూజించే పుణ్యదినం

ఏరువాక పున్నమి ఓ పవిత్రోత్సవం 

హాలికుని కుటుంబాన అంబరం తాకే సంబరం 

బతుకు విత్తనాలు చల్లగ మెతుకుల పంటకై

తమ శ్వాస ధ్యాస సేద్యం పైనే సమస్తం

భూమికి భుక్తికి నడుమ అవినాభావ సంబంధం                          

ప్రకృతి విపత్తుల నివారించి

ధాన్యపు సిరులు కురిపించాలని నివేదించే దినం

ఆడ పడుచులు పుట్టింటికి చేరగా

కర్షకుల కళ్ళ నిండా కోటి కాంతులు

రైతే రారాజైతే పల్లెలన్నీ సుభిక్షం!దేశ ప్రగతికి సోపానం!

(24 జూన్, రైతన్నలకు ఏరువాక పున్నమి శుభాకాంక్షలతో)