కొరియర్ బాయ్;-నెల్లుట్ల సునీతఖమ్మం- సెల్ ;7989470657

మనుగడే ప్రశ్నార్ధకమై

 మరో మార్గం లేక  

బరువుల  బ్యాగ్ ను మోస్తూ

 అతని నిరంతర

 జివీత యాత్రలో

అవిశ్రాంత శ్రమలో

  అణుశక్తి ఇంధనం

  దేహంలో నింపుకుని

కాంతివేగంతో కాలంతో

 పరుగులు పెడుతూ

బతికేయడం నేర్చినోడు

దూరమైన భారమైన 

చిరునామాలను జల్లెడ పడుతూ

అరచేతిలో నిలిచిన 

సెల్ఫోన్తో ఆత్మీయ 

పరిచయంతో

వేడుకలు విలాసాలకు

 అందరికీ ఆనందం పంచేటోడు

వస్తువుల అందజేత

  వెతల వెతుకులాటలో అతని 

బతుకు వేట సాగిస్తూ

ఉద్యోగ ధర్మంలో సమస్యల 

వంతెనలు దాటుతూ

జీవితానుభవాలెన్నో గడించినోడు

ఆధునిక జీవనశైలిలో

 నమ్మకానికి నిదర్శనంగా

 నిలిచి

నెట్టింట్లో నుండి

 నట్టింట్లోకి ప్రయాణిస్తూ

కాసు రూపేనా కానుకలు

 ఇస్తూ

 మండుటెండల్ని లెక్కచేయక

జడివానలో తడిసి 

ముద్దవుతూ

 వణికే చలిలో సైతం

 మంచునే యూనిఫామ్ గా 

ధరించి

ద్విచక్రవాహనంపై 

గల్లీ గల్లీలో తిరిగే 

పొద్దు తిరుగుడు పువ్వు అతను

చదివిన చదువులకు

 ఉపాధి కరువై

కుటుంబ పోషణ సవాళ్లను

 అధిగమించే జీవన

 నైపుణ్యాలు పుణికిపుచ్చుకొని

నిరుద్యోగ ముసుగులో 

ఉన్న ఉద్యోగి అతను

ఇంటి ముందు కాలింగ్ 

బెల్ నొక్కి 

కొరియర్ కొరియర్ 

అని తీయని పలకరింపుతో

 అందరికీ ఆత్మబంధువై

హైటెక్ వ్యాపార 

సేవలు అందించే

 కొరియర్ బాయ్

అతనే డెలివరీ బాయ్