నవనవోన్మేషం-ముద్దు వెంకటలక్ష్మి-కలం స్నేహం

నిత్యనూతన జానపద గేయాలలో

నడయాడిన నవరస తెలుగు

                           కవిత్వ విన్యాసం

నన్నయ మార్గకవితలో లిఖితరూపమై

నూతన రీతుల పాల్కురికి, 

నన్నెచోడుల జానుతెనుగులోనర్తించి,

నాటకీయ శైలిలో తిక్కన గంటాన

నాట్యమాడింది ;

నడిమి భారత భాగాన్ని రచించిన

నైపుణ్యవంతుడు ఎఱ్ఱన కవీశ్వరుని

వర్ణనల్లో ఎదిగి ఒదిగింది ; వాణి నెన్నెదుటను

 శిరసు వంచి కవిత్వ తత్త్వ మహత్వాన్ని,  కవనాన 

నేర్పునూ సాధించిన అద్భుత కవి,

నిరుపమాన కవి పోతన్న రచించిన

నందగోపుని భాగవత కథలతో

నాడూ నేడూ అందరి నాల్కలపై

నృత్యం చేస్తోంది ;

నాదోపాసకుడు శ్రీనాథుని నైషథ

                               కావ్యంలో,

నుగ్గు నుగ్గయిన కంచుఢక్కలో

నూతన సొబగులను పొందింది, 

నవ్యరీతుల ప్రబంధాల్లో నయగారాలొలికించింది,

నొక్కి వక్కాణించి నవలీకరించిన

నోరి నరసింహశాస్త్రి రచనల్లో

నిగారింపు నందింది ;

నీతికథల దారుల్లో నిబద్ధమై నైతిక

జీవనాన్ని నిర్దేశించింది ;

నాటి నుంచి నేటి కవుల

కవుల విభిన్న రీతుల్లో

నవనవోన్మేషమై నిఖిలమై నిలుస్తోంది. 

                           

నవ్య కవులు నిఖార్సైన

                పదబంధాల్లో

నింగికి నేలకు వేసిన నిచ్చెనపై

నిగనిగలాడుతూ నభముపై విజయ నికేతనమై విరాజిల్లింది ;