అనాథ బాలలు (బాలగేయం):;-:- డా.గౌరవరాజు సతీష్ కుమార్.

అమ్మానాన్నలు ఎవరో ఏమో

తెలియనే తెలియదు మాకు

మా కష్టాలెవరితొ చెప్పుకోవాలో

తెలియనే తెలియదు మాకు!

ఆకలి కడుపుతో మాడేవారు

రోడ్డుమీది ఈగల మాదిరి

పెంటమీది చెత్తమాదిరి

ఎవరిపిల్లలమో ఏమో ఏమో!

వానకు తడిసిన, ఎండకు ఎండిన  

చలికి వణికిన, గాలికి ఒరిగిన

ఎడారి ఒంటెలం అవునో ఏమో

ఎవరిపిల్లలమో ఏమో ఏమో! 

కడుపు నొచ్చినా, కాలు నొచ్చినా

జొరం వచ్చినా, రోగం వచ్చినా  

కుక్క చావు చస్తాము

ఎవరిపిల్లమో ఏమో ఏమో!

ఎవరో చేసిన తప్పుడు పనులకు

నిజమైన సాక్షం మేమే మేమే

రోడ్డునపడ్డ మా బాల్యంతో 

భావిభారతం ఏమౌనో ఏమో?!