సమ్మోహనాలు (ముక్త పదగ్రస్తం);-ఎం. వి. ఉమాదేవి --వనజ

నెమలీక 

వనమాలికే ప్రియము 

ప్రియము శిఖి పింఛము 

పింఛమే మోహనము ప్రతివారికీ వనజ !

శైశవపు భ్రాంతియిది 

భ్రాంతి కల్గించెనిది

కలిగించి పుస్తకం లోదాగె ఓ వనజ !

వనముకే మహరాజు 

మహలులో రారాజు 

రారాజు మయూరం అలరించు ఓ వనజ !

వనితవలె సుకుమారి 

సుకుమార భావవిరి 

భావములు వికసించు నెమలీకతో వనజ !

నెమలి కన్నులు చూడు 

చూడు పండుగ నేడు 

నేడెక్కడా లేవు అరుదైనవో వనజ !!