నిస్వార్థ జీవి;-గుండాల నరేంద్రబాబు

పల్లవి:

మల్లె కన్న తెల్లనైన

మంచు కన్న చల్లనైన

 మనసున్న ఓ నాన్న 

 మమతున్న ఓ నాన్న

వెన్నెలoత హాయియైన

వెన్న కన్న మెత్తనైన

 మది వున్న ఓ నాన్న

 హృది ఉన్న ఓ నాన్న 

చరణం:1

కష్టాన్నే నమ్ముకున్న కర్మజీవే నాన్న

ఇష్టాల్నే నెరవేర్చే ధన్యజీవే  నాన్న 

లోకాన్నే చూపే మార్గ  దర్శ నాన్న 

శోకాన్నే మాపేటి బుద్ధుడే  నాన్న 

చరణం:2

 

కరుగుతు వెలుగు పంచే దీపమే నాన్న

అరుగుతు గంధం పంచే రూపమే నాన్న

తరుగుతు వెన్నెల నిచ్చే త్యాగమే నాన్న

 ఒరుగుతు ఓరిమి

నింపే ధైర్యమే నాన్న 

 

చరణం:3

బ్రతుకంతా తోడుగ నిలిచేదే నాన్న

తప్పటడుగుల్లోన చేయూతే నాన్న

కష్టాల కడలిలోన దిక్సూచే నాన్న

నష్టాల దారుల్లో వెన్నుదన్నే నాన్న

చరణం:4

శిశిరoలోన  ఆమని కోయిలే  నాన్న

అమాసలోనా పున్నమి చంద్రుడే నాన్న 

చెమట చుక్కల్లోన స్వర్గమే నాన్న

చెరకు గడలలోనా తియ్యదనమే నాన్న  

   

  

గీత రచన:

గుండాల నరేంద్రబాబు  

 తెలుగు పరిశోధకులు 

శ్రీ వెంకటేశ్వర విశ్వవిద్యాలయం, తిరుపతి 

తేది:18-06-2022

సెల్: 9493235992.

(19.06.2022 పితృ దినోత్సవం సందర్భంగా)