నా గుండె గూటిలో...!(కవిత);-కొత్తపల్లి ఉదయబాబు-సికింద్రాబాద్

గాలివాటంగా కొట్టుకుపోతున్న గుండె

నీ సౌందర్య వృక్షపు కొమ్మకు చిక్కిన వేళ

నాకూ ఒక హృదయం ఉందన్న స్పర్శ!

అప్పటి నుంచి అనుక్షణపు తాపత్రయం!

ఆశల పుడకలు, కోరికల పుల్లలు

పునాదిగా మొదలైన గూటిలో...

ఏ పుడక నీకు అసౌకర్యం కల్పిస్తుందో

ఏ పుల్లముక్క నీకు మచ్చని మిగుల్చుతుందో..

పరస్పర వ్యతిరేక భావాలరణరంగంలో

గూడు కుటీరమవ్వడం యాదృశ్చికమే!

లేతాకుపచ్చ గడ్డిపరకల పానుపుపై

అలవోకగా వాలిన మంచుబిందువుల

కుంభకారపు వక్రతలాలు 

నీ దేహఛాయాకిరణకాంతికి

పరావర్తనయానకాలైనవేళ

నా గుండెగూటి ప్రేమమందిరాన

నీ ప్రణయరూపం

ఆరాధ్యదేవతగా ప్రతిష్టితమావుతూ...

నన్ను తాధాత్మ్యతలో నింపేస్తూ...!

సమాప్తం