సుప్రభాత కవిత ; -బృంద

ఎదురొచ్చిన వసంతానికి

ఎద నిండిన వసుమతికి

ఏమిటి బంధం?

కురిసేటి పుత్తడి వెలుగులకూ

కులికేటి పచ్చిక బయళ్ళకూ

ఏ అనుబంధం?

పయనించు పాదాలకూ

పరచిన సన్నని దోవకూ

ఏమున్నది మమకారం??

నింగిని పరుగులిడు నీలిమబ్బులకూ

గిరిలోయల తిరుగాడే

గాలి తెమ్మెరకూ ఏ ఆత్మీయత?

జారే జలపాతానిదీ

ఎదురు చూసే కడలిదీ

ఏ అనురాగం?

సాగేటి జీవన గమనానికి

నీడనిచ్చే మజిలీలకూ

ఎక్కడిదీ అభిమానం?

తూర్పున విరిసే రంగులకూ

తోటను విరిసే పువ్వులకూ

ఎందుకీ ఉల్లాసం?

గడచిన కలతల క్షణాలకూ

రాబోయే కలల వేకువకూ

మధ్యన మురిసే మనసుతో

🌸🌸 సుప్రభాతం 🌸🌸