దరికి చేరి, దారి చూపి,/
దిశా నిర్దేశాన్ని తెలియ జెప్పి,/
దిక్సూచిలా సహకారాన్నందించి/
ప్రతీ విద్యార్థి ప్రగతికి ఓ సోపానంలా,
సాధనంలా మలచబడి,/
సుఖాల సౌధానికి నిను చేరువ చేసే
సత్యశీలుడే గురువు./
సుశీలుడు, సుశిక్షితుడు, సంరక్షకుడు. /
అజ్ఞాన తిమిరాన్ని అధిగమించేలా,/
అధోలోకానికి నువు అణచబడకుండా ఆదుకుంటూ,/
అన్నివేళలా ఆదర్శాన్ని అంతటా నింపుతూ,/
విద్యా వ్యవసాయాన్ని చేసే కృషీవలుడు
మన ఉపాధ్యాయుడు. /
ఓ వృత్తిలా, ఉపాధిలా కాక,అంకిత భావంతో ఆచరణాత్మకంగా కొనసాగే కర్షకుడు. /
గురువు లేని స్థలం లేదు.
చదువు లేని స్థానం మనలేదు./
రాజులైనా , వీరభోజులైనా విద్యలేక ఉన్నతి లేదు./
నిత్యవిద్యార్థిలా నిరంతరం అధ్యయనం చేస్తూ,
అభ్యసనాలను నేర్పిస్తూ,/
నైతిక విలువలను, సమాజ పోకడలను/
సమయస్ఫూర్తితో నీలో చొప్పిస్తూ,/
క్రమశిక్షణను కఠినంగా అమలు పరుస్తూ,/
ఆచార్యునిలా ఆదేశాలనిస్తూ,/
ఆవేశాలను అదుపు చేస్తూ,/
ఆత్మ బంధువులా అక్కున జేర్చుకుంటూ,/
అక్షర సేద్యం చేస్తున్న అమరుడు, మన
గురువర్యుడు./
కఠిన శిలను కమనీయ శిల్పంలా మలిచే/ మహానీయుడు, మహాఋషి తుల్యుడు. తల్లిదండ్రులను మరిపించి, తోడుగా, నిలిచే నిజనేస్తం గురువు. సంజీవనిని సైతం ఎఱుక పరిచేవాడు గురువు. త్రిమూర్తులను మించిన త్రికాల జ్ఞాని గురువు. నిలువెత్తు విజ్ఞాన భాండాగారం గురువు. నిత్యం నేలపై నడయాడే స్వయంభూ గురువు. అన్నిటినీ మించి సాక్షాత్ ఆ భగవత్స్వరూపుడే "మన గురువు.
ఈ కవిత నాదేనని హామీ ఇస్తూ..
addComments
కామెంట్ను పోస్ట్ చేయండి