సమ్మక్క సారలక్క పద్యాలు:;- డి.వినాయక్ రావు M.A. MEd భైంసా , జిల్లా నిర్మల్ ఫోన్ 9440749686

కం:కూనగ జనించి కానల

దానవ జనమంత మొంద ధైర్యము వలనన్

రాణిగ  సమ్మక్కయ్యెన్

జానిగ పగిడిద్దరాజు సరసన నిల్చెన్

సీ:సమ్మక్క సంతయ్యె సారలక్కయు నాగ

వనదేవతలు వారు వరము లిచ్చు

గిరిపుత్రులందరి మురిపించు వేల్పులు

చిలుక గుట్టలయందు స్థిరము నైరి

జంపన్న వాగులో స్నానాలు జేసేరు

గొలువగద్దెలపైన గొలువు దీరు

బంగారమనియిచ్చు  భక్తి బెల్లపుముద్ద

కడుప్రీతి నొందుతు కడుపునింపు

ఆ.వె:దేవ గణము నుండి దివ్యులై వచ్చిరి

మాన వులుగ మారి మంచి జేయ

శౌర్య మున్న వారు సమ్మక్క సారక్క

సమర భూమి యందు సమరథుండ్రు

చం: వనముల వేల్పులై జనము భాగ్యమునొందను  కొల్వు దీరుచున్

కనపడు మూర్తులయ్యెనవి కాంచన భర్ణులు దైవ రూపులై

జనమది నొంద సంతసము జాతర జేయగ సాగె, పూజలో

తినుమని తల్లులిద్దరిని  దీనులు వేడుచు బెల్లమీయగన్

మత్తే:వనమందున్ జన వేల్పులై  వెలసె  నివ్వంగన్ వరాలడ్గ నా

 జనమౌ సంద్రము గొల్వ దేవతలగున్ సమ్మక్క సారక్కలా

ఘనమౌపూజలు మేలతాళములు మ్రోగంగాను వారిర్వురిన్

వనమౌ సంతస సంబరంబగును  గొల్వంగా ప్రజా తల్లులన్

ఉ:దీరులు శూరులిర్వురును దీనుల బ్రోచెడి దైవరూపులా

మూరితి నమ్మలిర్వురిది ముద్దగు  కుంకుమ భర్ణులందునన్

బారులు దీరు దర్శనము భాగ్యము నంటుగ భక్తు లందరున్

సారెను చీరలివ్వగను  సౌఖ్యము పంచెడు తల్లులిర్వురున్