ఉగాది: సాహితీ సింధు, పద్యగుణవతి సరళగున్నాల

 ఉ*మామిడితోరణమ్ములు,సుమమ్ముల నొక్కటగూర్చిదైవమున్

నీమనియామనిన్బ్రతుకు

నెయ్యడసంతసమందు నట్టులన్

రాముడు దివ్యదృష్టినిడి రాగసరాగము లందజేసి యా

రామము నిచ్చి క్రోధి మన ప్రాణము కింత సుఖంబు లిచ్చునో

చ*పులుపుల మామిడుల్ వగరు పొందగవోమనువేసికూర్చుచున్

తలపున తీపి బెల్లములు స్థానమునైచరియింప,కారమున్

వెలుపల నుంచి ప్రేమలిడి వీడనహమ్మును, క్రోధి సంతసం

బులనిడగా 'యుగాది'శుభపూర్ణతగా జరిపించుకోవలెన్

కం* క్రోధీ !వత్సరమా మము

బాధల గొనకుండ గనుమ వసుధా స్థలిలో

సాధనమై, కార్యమ్ముల

శోధనలో దీవెనలిడు శోభితమొప్పన్

ఉ*మామిడి లేతచిగుళ్ళును మాధురులందెడుకొత్తబెల్లమున్

క్షేమమొనర్చు వేపలును చింతయుదీర్చెడుచింతలన్ నిరా

కారపు నీటికిన్గలిపి కారమునుప్పును వోమనింతయున్

మీరగ వేసి జేయనది మిన్నగుపచ్చడి త్రాగరండహో

చ*వనములు మాయమయ్యె కనుపారిననంతట మేడలయ్యె  చే

కొనుటకుగింజలేమియనుకొన్నది పొందగపట్టులాయె నా

కనులకు గాన రాని మమకారపు బంధము లెట్టుపోయెనో

వినుటకు వింత, క్రోధి యిక పెన్నిధి నీవయి దారిజూపుమా

మ*గతకాలంబున చింత లున్న నవియున్గావింపదౌర్భాగ్యమున్

సతతంబింతయుసౌఖ్యమందుకొనకన్  సాధింపులన్నొందినన్

మతివీడంగ విషాదహేతు వయినన్మార్గంబుదాజూపుచున్

స్థిత ప్రజ్ఞుండుగ నిల్వ క్రోధి వరెలెన్ చైతన్యమందించగా