సుప్రభాత కవిత ; - బృంద

చినుకుగా నేలకు వచ్చే

నీటిదెంత సంబరమో!

చిత్తడిగా పుడమిని తడిపే

వానదెంత ఔదార్యమో!

ఏ చినుకు ఎవరికి వరమై

ఏ కబురు తెచ్చేనో!

ఏ చెమ్మ ఎవ్వరి మదిలో

ఏ మమతను కరిగించేనో!

ఏ చివురుకు కొత్త ఊపిరిగ

ఏ కొమ్మను అలరించేనో!

ఏ పువ్వుకు ముద్దును అద్ది

ఏ రేకుపై ముత్యమయేనో!

ఏ మొక్కకు ప్రాణం పోసి

ఏ మొక్కును తీర్చేనో

ఏ జీవికి దాహం తీర్చి

ఏ దీవెన పొందేనో!

ఏ ధారలో కలిసిపోయి

ఏ కోనలో సాగేనో

ఏ వాగుగ నదిని చేరి

ఏ చేనిని తడిపేనో!

ఏ నేలకు జీవం పోసి

ఏ పంటకు కారణమౌనో

ఏ కష్టానికి ప్రతిఫలంగా

ఏ కడుపును నింపేనో!

ఏ కన్నీటికి చల్లగ తోడై

ఏ వేదన కరిగించేనో

ఏ మదిలో వెతలో కదిల్చి

ఏ హృధికి బరువు దింపెనో!

ఏ మబ్బులు ఎంత కమ్మినా

ఏ  వానలు ఎంత కురిసినా

వేకువ రాక ఆగదు

వెలుతురు తేక మానదు

కలతల మబ్బులు తొలగించే

కమ్మని  ఉదయానికి

🌸🌸 సుప్రభాతం🌸🌸