మబ్బుల వెనుక...;- డా.టి.రాధాకృష్ణమాచార్యులు -9849305871

అంతరిక్షం ఆవల గాలి 

పరుచుకున్న ఆకుపచ్చ దేహం

రెపరెపల ఆశ విప్పుకున్న రెక్కలు

 

పూలు గుచ్చిన బాధ ముళ్ళ నాగళ్ళది 

తడిసిన పంటపొలాల కన్నీరు  విషాదప్రకృతి గుండె కోత

మనిషి ఉనికిని లక్ష్యించిన దాడిపై 

మానవత్వమే పోరాట ఆయుధం

చిరుజల్లులై ఎగిసి ముంచిన

నింగి నది ఓ ప్రళయగీతం 

మునిగిన నేల హాహాకార రణ క్షేత్రం

నీరైన ఒళ్ళంతా అలల కత్తి గాయాలు 

నీరైన ఖడ్గదాడి విలోమ పేరాశల దారి

 

నిద్ర లేవని సూర్యుడు వినని ఆర్తనాదం మనిషి నోటి గాయాలు 

తడి సోకని చెమట నీరైన వేదనకావ్యం 

ఎవరి మాట వినిపించని వాన మనసు 

తనువంతా అలల అల్లకల్లోల గర్భం 

ఏ వెన్నెల రాకకోసమో ఈ తండ్లాటలు 

ఏ సహాయ ఆత్మీయ చేతుల సోపతి కొరకో 

కష్టాలూ కన్నీళ్ళు కలిసిన కవిత్వం 

తడతడి తనువున రాసే మౌన రోదన 

మట్టీ మనిషి రాగానుబంధం 

జలాంతర్యామి ముంచెత్తిన పాట

ఎవరూ పాడని అస్తవ్యస్త విగత విషాదం