ఎగిరే పతంగం;- డా.టి.రాధాకృష్ణమాచార్యులు-9849305871

చుక్కల ముగ్గు నీలాకాశం చూసే కిందకు 

ఎగిరే చిరునవ్వు రెక్కల భూమి పైన  

నడుమ దృశ్యం బతికిన ప్రకృతి

కష్టసుఖాల ఊపిరి చౌరస్తా 

మట్టి పొత్తిళ్ళ మూలాలే నుడికారం

ఆత్మీయ భాష నేర్పింది అమ్మ వొడి

నాడి మీటిన జీవితమంతా

కరెంట్ ప్రసరించే ఆకుపచ్చ కవాతు

అమ్మ నిమిరిన తల నవ్వింది

కట్క నొక్కితే కరెంటు వెలిగినట్టు

రంగుల కాన్వాస్ పై జీవించే భూమి అనువంశికం

త్యాగాల రక్తదాత తల్లి ప్రేమైనా అద్భుత సంవేదన 

నవ్వు చూపే అద్దం కోసం జనని పురుడు పోసుకున్నది ప్రాణాలను జనన మరణ యజ్ఞంలో

బతుకంతా కలల కన్నపిల్లల  లోకం

మమతల మల్లెల కాంతి కళ వికసిత పరిమళం 

నింగీ నేలను కలిపిన వంతెన 

మనిషి 

స్వేచ్ఛ ఎగిరే పతంగం వికసిత మానవత్వ సంతకం