ఆరోగ్యాన్ని ప్రసాదించే అద్భుత పుష్పం. :- తాటి కోల పద్మావతి

 మనిషికి సృజనాత్మక, హడాత్మక హృదయం ఉండాలే గాని ఎన్నెన్నో అద్భుత సౌందర్యాత్మక కళాఖండాల్ని ప్రకృతి మనకు బహుకరించింది. ఈ కుసుమం ఎంత లావణ్యంగా ఉందో దీని సుమధుర పరిమళాన్ని ఒకసారి పరిశీలిస్తే ఎలాంటి ఉదయమైనా ఒక క్షణం ఆ మధురానుభూతికి లోనవుతుంది. ప్రకృతి ప్రేమికులు, భావకులు, కళాత్మక హృదయులు ప్రత్యక్షంగా ఈ కుసుమాన్ని చూస్తే క్షణకాలం అద్విత అనుభూతికి లోను కాక తప్పదు. గులాబీ, మొగిలి, మల్లెపూల సంయుక్త పరిమళం విరివిగా గుబాలించడం అద్భుతం కాదంటారా! శతరేఖ పుప్పి, భారత సుమన్ మొదలగు పేర్లు గల ఈ పుష్పం వర్షాకాలంలో శీతల వాతావరణం లో ఉదయం పుష్పించి సాయంత్రం వరకు వాడిపోతుంది. ఇంటి ముందు పందిరికి అల్లుకొని సుకుమారంగా పెరుగుతుంది. తులసీకన్నా లక్ష్మీకరం శుభకరం గా భావిస్తారు. ఆయుర్వేదంలో ఈ పుష్పం, వంధ్యా స్త్రీలకు సంతానానికై ఇతర సాఫల్యాలు ఔషధాలతో వాడితే అద్భుత ఫలితాన్ని ఇస్తుంది. కాంక్రీట్ జంగిల్ లో కమనీయ మొక్కని పెద్ద పూల కుండీలో ఎర్రమట్టి నింపి ఆధారాన్ని ఊతమిస్తే అల్లుకొని పైకి ఎదుగుతుంది. చూడటానికి చాలా అందంగా ఉండటమే కాదు. ఈ పుష్పం నీలిరంగులో ఉండి మధ్యలో శివలింగాకారం చుట్టూరా పంచపాండవుల వంటి ఐదు రేఖలు దాని చుట్టూరా భారతంలో కౌరవుల వంటి వందరేకులు ఇలా పువ్వులో సంతరించుకొని ఉంటాయి. 
ఇలాంటి సౌందర్య రాసిన అద్భుత పుష్పాన్ని మనం చూడగలగటం ఎంతో అదృష్టం.