ఒత్తిడి లేని విద్య: సమతుల్య అభివృద్ధికి మెట్టు:-సి.హెచ్.ప్రతాప్

 విద్య అనేది వ్యక్తి జీవితాన్ని మార్చగల శక్తివంతమైన సాధనం. కానీ ఈ విద్యే నేడు పిల్లలకు భయం, ఒత్తిడి, తీవ్ర పోటీ అనే రూపాల్లో భయానకంగా మారుతోంది. చిన్న వయస్సులోనే పిల్లలు పరీక్షల భారం, మార్కుల ఒత్తిడి, తల్లిదండ్రుల అంచనాలు, స్కూల్ హోమ్ వర్క్‌లు, కోచింగ్ సెంటర్ల ఒత్తిడి వంటి అంశాలతో సతమతమవుతున్నారు. దీని ప్రభావం శారీరక, మానసిక ఆరోగ్యంపై తీవ్రంగా పడుతోంది. అలాంటి పరిస్థితుల్లో ఒత్తిడి లేని చదువు పద్ధతులు సమాజానికి అత్యవసరమయ్యాయి.
ప్రస్తుత విద్యా విధానం ఎక్కువగా మార్కులపైనే కేంద్రీకృతమై ఉంది. విద్యార్థులు ఏ విధంగా నేర్చుకున్నారు అనే దానికన్నా, ఎంత స్కోరు సాధించారన్నదే ముఖ్యం అయిపోయింది. దీని వల్ల సృజనాత్మకత, ఆసక్తి, నిజమైన ఆలోచన శక్తి నశిస్తోంది. కొన్ని చిన్న వయస్సులోనే పిల్లలు మానసిక ఒత్తిడికి గురై డిప్రెషన్, ఆత్మహత్యలు కూడా చేసుకుంటున్నారు. ఇది భవిష్యత్ సమాజానికి ప్రమాద సంకేతం.
ఒత్తిడి లేని చదువు అంటే పాఠ్యాంశం లేకపోవడమా? అని అనుకోవచ్చు. అసలు విషయం అది కాదు. పాఠ్యాంశాన్ని పిల్లలకు సులభంగా, ఆసక్తికరంగా, అనుభవాల ఆధారంగా బోధించాలనే భావనదే ఇది. ప్రశ్నలకు నూరేళ్లుగా మారని సమాధానాల్ని కూర్చోబెట్టి రాయమని చెప్పడం కాదు. బదులుగా పిల్లల ఆలోచనను ప్రేరేపించే విధంగా బోధన జరగాలి. వాళ్ల స్వతంత్ర భావనకు స్థానం ఇవ్వాలి.
పిల్లలకి ఆటలు, కళలు, శారీరక వ్యాయామం, సమాజంతో సంబంధిత అంశాలలో కూడా విద్యను పొందే అవకాశాలు ఇవ్వాలి. చదువులో సౌందర్యాన్ని, జీవన మార్గదర్శకతను చూడగలగడం వారిలో అభివృద్ధి చెందాలి. ఈ మార్పు ఉపాధ్యాయుల నుండి మొదలై, తల్లిదండ్రుల సహకారంతో పాఠశాలల వరకు వ్యాపించాలి.
అభ్యాసం వలన వచ్చిన విజయం తాత్కాలికం కావచ్చు, కానీ ఆనందంగా నేర్చుకున్న విద్య జీవితాంతం నిలిచే సంపద. ఒత్తిడి లేని చదువు పద్ధతులు పిల్లల వ్యక్తిత్వ వికాసానికి, మంచి పౌరులుగా ఎదగడానికి మార్గం వేస్తాయి. పాఠశాలలు మార్కుల కేంద్రిత పద్ధతుల నుంచి పిల్లల శ్రద్ధా, నేర్చుకునే ఉత్సాహాన్ని ప్రోత్సహించే విధానాలవైపు మళ్ళాలి.
సారాంశంగా చెప్పాలంటే, భవిష్యత్తు సమాజాన్ని నిర్మించాల్సిన ఈ చిన్నారులకు ఒత్తిడి లేని, ఆనందదాయకమైన విద్యాబోధనే నిజమైన బహుమతి. చదువు ఒక భయం కాకుండా, జ్ఞానాన్ని ఆనందంగా పొందే ప్రయాణంగా ఉండాలి. అలాంటి మార్గాన్ని తీసుకురావడం పాలకుల, ఉపాధ్యాయుల, తల్లిదండ్రుల బాధ్యత.