డ్రైవర్ తీరు!:- - యామిజాల జగదీశ్

 జపాన్ రాజధాని టోక్యోలో, ఒక విదేశీ వ్యక్తి టాక్సీ ఎక్కాడు. భాషా అవరోధం కారణంగా, అతను పెద్దగా చెప్పలేకపోయాడు. కేవలం  అతను వెళ్తున్న ఇన్ స్టిట్యూట్ పేరు మాత్రమే చెప్పాడు. డ్రైవర్ మర్యాదతో " సరే, ఎక్కండి" అన్నిట్లు తల ఊపాడు సాదరంగా తలుపు తెరిచి. జపనీస్ మర్యాదకు అనుగుణంగా అతన్ని లోపల కూర్చోమన్నాడు.
డ్రైవర్ ఎప్పటిలాగే మీటర్‌ యాక్టివేట్ చేశాడు. కానీ కొంత సమయం తర్వాత, అతను అకస్మాత్తుగా మీటర్ ని ఆఫ్ చేశాడు. కొంత దూరం వెళ్ళిన తరువాత మీటరుని తిరిగి ఆన్ చేశాడు. ఇదంతా గమనిస్తున్న ప్రయాణికుడు డ్రైవర్ ఎందుకలా చేశాడో అర్థం కాలేదు. భాష తెలీకపోవడంతో ఏమీ  అడగలేదు కానీ ఆశ్చర్యపోయాడు ప్రయాణికుడు. 
తీరా గమ్యస్థానానికి చేరుకోవడంతోనే ప్రయాణికుడు ఇన్ స్టిట్యూట్ లో ఉన్న ఒకతనితో మాట్లాడుతూ మార్గమధ్యంలో డ్రైవర్ ఎందుకు మీటర్ ఆఫ్ చేశాడో, తర్వాత ఎందుకు ఆన్ చేశాడో అడగండి అని చెప్పాడు.
అప్పుడా ఇన్ స్టిట్యూట్ మనిషి
సరే నని ఏమిటి సంగతి అని డ్రైవరుని అడిగాడు. 
*అదా" అంటూ డ్రైవర్ ... "నేను దారిలో పొరపాటు చేసాను. నేను కుడి మలుపులో తిరగవలసింది తిరగక  పొరపాటున మరొక మలుపులో తిరిగాను. దీంతో చాలా దూరం వెళ్ళాక గానీ  మళ్ళీ సరైన దారిలోకి రాలేకపోయాను.  ఇక్కడ నా పొరపాటు వల్ల అదనపు దూరం ప్రయాణించాల్సి వచ్చింది. ప్రయాణీకుడు చేయని తప్పుకి నేను ఆయన నుంచి అంత దూరానికీ అదనపు ఛార్జీ వసూలు చేయలేను కదండీ. అందుకని పొరపాటున వెళ్ళిన రూటులో వెళ్ళినంత సేపూ మీటరు ఆఫ్ చేసి ఉంచాను. సరైన మార్గంలోకి వచ్చాక మీటర్ మళ్ళీ ఆన్ చేశానండి" అని ఎంతో అణకువతో వివరణ ఇచ్చాడు.
డ్రైవర్ సత్ప్రవర్తనకు, నిజాయితీకి ఈ వివరణ ఒక చక్కటి  ఉదాహరణ కదూ!!