రక్తపాతమా? రాజ్యాధికారమా?:- కవి రత్న సాహిత్య ధీర సహస్ర కవి భూషణ్ పోలయ్య కూకట్లపల్లి అత్తాపూర్ హైదరాబాద్

ఓ అన్నలారా..! ఓ అక్కలారా..!
ఓ చెల్లెల్లారా..! ఓ తమ్ముల్లారా..!
ఓ అంబేద్కర్ వారసుల్లారా..!
పూరిగుడిసెలో పుట్టిన ఓ పులుల్లారా..!
సునామి ముంచుకొస్తున్నా...
పిడుగులు నెత్తిన పడుతున్నా...
ఎంతకాలంరా..? ఈ మొద్దు నిద్దుర....
వద్దురా వద్దురా ఈ మొద్దు నిద్దుర...
ఇకనైనా బద్దకం వీడరేమిరా...?
కళ్ళుతెరిచి ఈలోకాన్ని చూడరేమిరా..?

రేపటి మీ పిల్లల బంగారు
భవిష్యత్తును...ధ్వంసం చేసేందుకు
ఎన్ని గుంటకాడి నక్కలు...
ఎన్ని మేక వన్యపులులు...
ఎదురు చూస్తున్నాయో...
ఒక్కసారి కళ్ళు తెరిచి చూడరేమిరా..?

మీరంతా చలిచీమల్లా
ఏకమై ఐక్యమై...చిరుత పులులై
ఒంట్లో ఓపికున్నంత వరకు కాదుకాదు బొందిలో...ప్రాణమున్నంత వరకు...

పోరాడాలిరా..! పోరాడాలిరా..!
మీ కోసమే కాదు...రేపటి
మీపిల్లల సురక్షితమైన
సుఖజీవనం కోసమైనా...
అంబేద్కర్ ఆశయాల సాధనకోసమైనా..

ఇప్పుడు ప్రశ్నించకపోతే...ఇంకెప్పుడు..?
ఇప్పుడు గొంతెత్తి మీ నిరసనను వినిపించకపోతే...ఇంకెప్పుడు..?
ఇప్పుడు ప్రతిఘటించకపోతే ఇంకెప్పుడు?
ఇప్పుడు పోరాడకపోతే...ఇంకెప్పుడు..?

ఇప్పుడు శతృమూకల్ని ఎదిరించకపోతే.?
ఇప్పుడు వారి గుండెల్లో నిదురించకపోతే?
గుండెల్లో గునపాలు దించకపోతే..?వారికి
గుణపాఠాలు నేర్పించకపోతే ఇంకెప్పుడు?

ఎదిరించండి..? బెదిరించండి..?
అంబేద్కర్ అందించిన ఓటునే
వజ్రాయుధంగా ధరించండి...
రక్తపాతమో..?
రాజ్యాధికారమో..?
తక్షణమే తేల్చుకోండి..?
పోరాడితే పోయేదేముంది చెప్పండి..?
మీ సంకెళ్ళు...తెగిపోవడం తప్ప..!
మీ సమస్యలు...పరిష్కారమవడం తప్ప.!
తరతరాల బానిసత్వం నుండి
మీకు విముక్తి..విశ్రాంతి లభించడం తప్ప.!