తక్కెడ పాఠం :----డా.పోతగాని సత్యనారాయణ

 ఒకానొక పల్లెటూరిలో చెలమయ్య అనే ఓ అమాయకుడు ఉండేవాడు. అతని అమాయకత్వం ఎంతలా అంటే, ఎవరు ఏది చెప్పినా, అది నిజమా కాదా అని ఆలోచించకుండా వెంటనే నమ్మేసేవాడు. అతని ఈ అమాయకత్వాన్ని ఆసరాగా తీసుకుని చాలామంది అతన్ని మోసం చేసేవారు. 
అదే గ్రామంలో నాగభూషణం అనే కిరాణా వ్యాపారి ఉండేవాడు. ఇతను కేవలం వ్యాపారి మాత్రమే కాదు, పక్కా మోసగాడు. తూకాల్లో మోసం చేయడం, మాయమాటలు చెప్పి అమాయక ప్రజల నుండి డబ్బు గుంజడం వంటి అక్రమాలకు పాల్పడేవాడు. అంతేకాదు, అవసరం ఉన్నవారికి అధిక వడ్డీలకు డబ్బు అప్పిచ్చి ఊరిలోనే అత్యంత ధనవంతుడిగా మారాడు.
ఓ రోజు చెలమయ్యకు పంచదార అవసరమైంది. మూడు కిలోల పంచదార కోసం నాగభూషణం దుకాణానికి వెళ్ళాడు. చెలమయ్య పంచదార అడగ్గానే, నాగభూషణం తన ఎత్తుగడను అమలు చేశాడు. త్రాసులో ఒక పళ్ళెంలో ఒక కిలో బరువున్న పంచదారను, మరో పళ్ళెంలో రెండు కిలోల బరువున్న పంచదారను పోశాడు. సహజంగానే తక్కువ బరువున్న ఒక కిలో పంచదార పళ్ళెం పైకి లేచింది. ఇదే అదనుగా నాగభూషణం పైకి లేచిన ఆ ఒక కిలో పంచదారను చెలమయ్య సంచిలో పోశాడు. ఆ తర్వాత, 
"మూడు కిలోలకు లెక్క సరిచేశాను, డబ్బులు ఇవ్వండి" అంటూ చెలమయ్య నుండి డబ్బులు తీసుకున్నాడు.
"నాగభూషణం, నువ్వు నాకు ఒక కిలో పంచదార మాత్రమే ఇచ్చావేంటి? నేను మూడు కిలోలు అడిగాను కదా?" అని చెలమయ్య అమాయకంగా అడిగాడు.
"చెలమయ్య! అందుకే నిన్ను అందరూ వెర్రిబాగులోడివని ఆటపట్టిస్తారు. నీకు తెలియదా? తూకంలో పైకి లేచిన పళ్ళెంలోని వస్తువే గొప్పది! తెలివైన వాళ్ళు దానినే తీసుకుంటారు. అది అత్యుత్తమమైనది" 
అని నాగభూషణం నవ్వుతూ, వెటకారంగా చెప్పాడు. నాగభూషణం మాటలను నమ్మిన చెలమయ్య, 
"సరేలే, అలాగే. నేనూ తెలివైన వాడినే. ఊరికే నీతో సరదాకి అన్నాను," 
అని తన తెలివికి తానే మురిసిపోతూ ఆ ఒక్క కిలో పంచదారతో ఇంటికి చేరాడు.
ఇంటికి వెళ్ళిన తర్వాత, తెచ్చిన పంచదార తక్కువగా ఉండటాన్ని చూసి చెలమయ్య భార్యకు అనుమానం వచ్చింది. 
"ఇదేంటి, ఇంత తక్కువ పంచదార తెచ్చావు? మూడు కిలోలు అన్నావు కదా?"  అని అడిగింది. 
జరిగినదంతా చెలమయ్య తన భార్యకు పూసగుచ్చినట్టు చెప్పాడు. నాగభూషణం తన భర్తను మోసం చేశాడని తెలుసుకున్న అతని భార్యకు కోపం నషాళానికి అంటింది. తన అమాయకపు భర్తను మోసం చేసిన నాగభూషణానికి తగిన బుద్ధి చెప్పాలని నిర్ణయించుకుంది. 
"అతనికి బుద్ధి రావాలంటే, ముల్లును ముల్లుతోనే తీయాలి! అదే అతనికి సరైన గుణపాఠం అవుతుంది" 
అంటూ ఒక తెలివైన ఉపాయాన్ని తన భర్తకు చెప్పింది. చెలమయ్య భార్య మాటలకు అంగీకరించి, సరేనని తల ఊపాడు. మరుసటి రోజు చెలమయ్య ధైర్యంగా నాగభూషణం దుకాణానికి వెళ్ళాడు. 
"నాగభూషణం! నాకు ఇరవై వేల రూపాయలు అత్యవసరం. కేవలం ఒక్క రోజులో తిరిగి ఇచ్చేస్తాను, వడ్డీ కూడా చెల్లిస్తాను" 
అని అడిగాడు. డబ్బులకు, అధిక వడ్డీకి ఆశపడిన నాగభూషణం, చెలమయ్య అడిగిన డబ్బు ఇచ్చి పంపాడు. తన డబ్బు సురక్షితంగా, వడ్డీతో సహా తిరిగి వస్తుందని ఆశించాడు. తరువాత రోజు, చెలమయ్య డబ్బు తిరిగి చెల్లించడానికి నాగభూషణం దుకాణానికి వెళ్ళాడు. 
"ఇదిగో నీ డబ్బు," అంటూ, కేవలం రెండు వేల రూపాయలను నాగభూషణం చేతిలో పెట్టాడు.
"నీకేమైనా మతిపోయిందా? నువ్వు తీసుకున్నది ఇరవై వేలు, తిరిగిచ్చేది రెండు వేలా? ఇంత మోసమా?" 
అని నాగభూషణం కోపంతో అరిచాడు. అతని ముఖం ఎర్రబడిపోయింది.
"మతిపోయింది నాకు కాదు, నీకే నాగభూషణం. కావాలంటే చూడు!" 
అంటూ నాగభూషణం చేతిలోని రెండు వేల రూపాయలను తీసుకుని, అక్కడే ఉన్న త్రాసులోని ఒక పళ్ళెంలో వేశాడు. ఆ తర్వాత తన జేబులోని పద్దెనిమిది వేల రూపాయలను మరో పళ్ళెంలో వేశాడు. చెలమయ్య ఆ విధంగా డబ్బులు పెట్టగానే, రెండు వేల రూపాయలు వేసిన పళ్ళెం పైకి లేచింది.
"చూశావా నాగభూషణం? తూకంలో పైకి లేచిన పళ్ళెంలోనిదే గొప్పదని నీవే చెప్పావు! అందుకే నీకు రెండు వేలు ఇచ్చాను. అది అత్యుత్తమమైనది కదా?" 
అని చెలమయ్య నవ్వుతూ, నాగభూషణం మాటలనే అతనికి తిరిగి వినిపించాడు. తాను చేసిన మోసం తనకే ఎదురుదెబ్బ తీసిందని, తన సొంత మాటల వలలో తానే చిక్కుకున్నానని తెలుసుకున్న నాగభూషణం సిగ్గుతో తలదించుకున్నాడు. తన మోసం బయటపడిందని గ్రహించి, చెలమయ్యను క్షమాపణ కోరాడు. చెలమయ్య, నాగభూషణానికి మిగిలిన పద్దెనిమిది వేల రూపాయలను కూడా ఇచ్చి, 
"నాగభూషణం! ఇకపై ఎవరినీ మోసం చేయవద్దు. నిజాయితీతో వ్యాపారం చెయ్యి. ప్రజల నమ్మకాన్ని గెలుచుకో. నిజాయితీగా సంపాదించిన డబ్బే నిలుస్తుంది" 
అని బుద్ధి చెప్పి అక్కడి నుండి గంభీరంగా వెళ్ళిపోయాడు. ఆ రోజు నుండి నాగభూషణం తన తప్పు తెలుసుకొని, తన మోసపు అలవాట్లను మానుకొని నిజాయితీగా వ్యాపారం చేయడం ప్రారంభించాడు.
చెలమయ్య కూడా తన భార్య తెలివితో కేవలం అమాయకుడిగానే కాకుండా, తెలివైన, ధైర్యవంతుడైన వ్యక్తిగా మారి, మోసగాడికి తగిన గుణపాఠం నేర్పాడు. ఈ సంఘటన ఆ గ్రామంలో చెలమయ్య పట్ల ఉన్న అందరి అభిప్రాయాన్ని మార్చివేసింది.