మగాడి వేషంలో...:- - యామిజాల జగదీశ్

 భర్తను కోల్పోయిన ఓ స్త్రీ దాదాపు ముప్పై ఏళ్ళుగా మారువేషంలో ఓ మగాడిలా జీవిస్తున్న వైనమిది. తన ఏకైక కూతురిని గట్టెక్కించడం కోసం ఆమె అలా బతుకుతున్నారు. 
తమిళనాడులోని తూత్తుక్కుడి జిల్లాలో గల కాట్టునాయకన్ పుట్టి గ్రామానికి చెందిన వారు పేచ్చియమ్మాళ్. ఆమెకు ఇరవయ్యో ఏట పెళ్ళయ్యింది. పెళ్ళయిన కొంత కాలానికే ఆమె గర్భవతి అవడం, గుండెపోటుతో భర్త మరణించడం జరిగిపోయాయి. ఆమెను మళ్ళీ చేసుకోమని కుటుంబసభ్యులు ఎంతలా ఒత్తిడి చేసినా ఆమె అందుకు సమ్మతించలేదు. కొన్ని నెలలకు ఆమెకు కూతురు పుట్టింది.
కుటుంబాన్ని చూసుకుంటూ ఇంటిపట్టున ఉండమని తల్లిదండ్రులు చెప్తూ వచ్చారు. కానీ ఆమె వారి పట్టించుకోలేదు. ఎవరికీ భారంగా ఉండకూడదనుకున్న పేచ్చియమ్మాళ్ ఓ గట్టి నిర్ణయానికి వచ్చారు.
గుండు చేయించుకుని విగ్ పెట్టుకుని మగాడిలాటి వేషధారణతో నలుగురిలో తిరిగారు. ఎవరికీ ఏ అనుమానమూ రాలనంతగా తయారయ్యే వారు. అంతేకాదు పేరు కూడా మార్చుకున్నారు "ముత్తు" అని.
ఇలా మగాడిలా నడయాడటం వల్ల కొందరి మగవారి విక్రత చూపుల నుంచి తనను తాను రక్షించుకోవచ్చని భావించారు.
హోటల్, టీ కొట్టు, పెయింటింగ్, క్లిష్టమైన కూలీ పనులనైనా చేయడం అలవాటు చేసుకున్నారు. ఆమె పని చేసిన ప్రతి చోటా మగాడే అనుకుని తోటి మగాళ్ళు ముత్తు మాస్టర్ అనే పిలిచేవారు. లేక అన్నా అని అనేవారు. అంటే ఆమె వేషధారణ ఎంతలా ఉండేదో ఆలోచించండి. ముత్తు అనే పేరు మీదే ఆధార్ కార్డు, వోటర్ కార్డు కలిగి ఉన్నారు. బ్యాంకులో ముత్తు పేరు మీదే సేవింగ్స్ ఖాతా ప్రారంభించారు.
బస్సుల్లోనూ మగవారి సీట్లలోనే కూర్చుంటున్న ఆమె పబ్లిక్ టాయిలెట్ లలో కూడా మగవారి క్యూ లైన్ లోనే నిల్చుంటున్నారు.
ముప్పై ఏళ్ళుగా ఆమె ఎవరికీ ఏ సందేహము రానివ్వని విధంగా మగవాడి వేషధారణతో నెట్టుకొస్తుండటం గమనార్హం. అంతేకాదు, తాననుకున్నట్లు కుమార్తెను చదివించి పెళ్ళి కూడా చేసారు పేచ్చియమ్మాళ్.