బ్రతిమిలాటలు:- గుండ్లపల్లి రాజేంద్రప్రసాద్, భాగ్యనగరం

మొక్కను బ్రతిమిలాడా –

రోజూ ఒకపువ్వు ఇవ్వమని,

చెట్టును బ్రతిమిలాడా –

నిత్యమూ ఒకపండు పంచమని.

నోటిని అడిగా –

తేనె చుక్కలు చిందమని,

పెదవులను అడిగా –

అమృత రసమును అందించమని.

అక్షరాలను కోరా –

అద్భుతంగా అందంగా అమరమని,

పదాలను కోరా –

పసందుగా ప్రేమగా కూడమని.

చేతిని వేడుకున్నా –

చక్కగా తియ్యగా వ్రాయమని,

మోమును వేడుకున్నా –

కుషీగా దేదీప్యంగా మెరవమని.

కలాన్ని అర్ధించా –

కదిలి కమ్మగా కూర్చమని,

కాగితాన్ని అర్ధించా –

నిలిచి పూర్తిగా నిండమని.

కవితను ప్రార్థించా –

కరుణ జల్లులు కురిపించమని,

విషయమును ప్రార్థించా –

విశ్వ రూపము ప్రదర్శించమని.

పత్రికలకు మనవిచేశా –

ముచ్చటగా ముఖ్యంగా ముద్రించమని,

ప్రచారమాధ్యమాలకు మనవిచేశా –

ప్రసిద్ధి ప్రాచుర్యము కలిగించమని.

గాయకులను అభ్యర్ధించా –

శ్రావ్యంగా మధురంగా పాడమని,

శ్రోతలను అభ్యర్ధించా –

మొత్తాన్ని మౌనముగా ఆలకించమని.

సాహితీవేదికలను వేడుకున్నా –

స్వాగతించి అవకాశం ఇవ్వమని,

ముఖ్య అతిథులను వేడుకున్నా –

నాలుగు మంచిమాటలు చెప్పమని.

మదిలోనితపనను విన్నవించా -

అంతరంగ గళమును తెరిచా,

హృదయస్పందనను తెలిపా 

సాహితీ మిత్రులను పలకరించా.