చూపుల చిత్రాలు – మౌన సందేశాలు: - గుండ్లపల్లి రాజేంద్రప్రసాద్, భాగ్యనగరం.

(ఓ చూపెయ్యండి)

చూపులు — మాటలు పలకక ముందే

మనసు పలికే మధుర భాషలు,

కన్నుల కిటికీ తెరచి

హృదయ గర్భాన్ని చూపించే వెలుగులు

కంటి చూపులు —

కలల దారులు; భావాల దీపాలు,

కొంటె చూపులు —

నవ్వుల పండుగలు; చిలిపి గాలులు.

దూరపు చూపులు —

దూరాన్ని దగ్గర చేసే వంతెనలు,

దొంగ చూపులు —

చూడనట్టే చూసే చూపులు.

కాల్చే చూపులు —

కోపాగ్ని రగిలించే క్షణాలు,

కట్టేసే చూపులు —

అనురాగపు బంధాలు.

పక్క చూపులు —

చక్కని దారి మళ్లింపులు,

వక్ర చూపులు —

ఈర్ష్య మబ్బులు.

చుట్టపు చూపులు —

అనురాగ బంధాలు,

చివరి చూపులు —

జ్ఞాపకాలలో నిలిచే నిశ్శబ్దాలు.

చూపులు చిన్నవైనా —

మనసుల ప్రపంచం మార్చే మహాశక్తులు,

మాటలు మరిచినా —

చూపులు జీవితాంతం మిగిలే గుర్తులు.