మంచిదోస్తుగాడు(జ్ఞాపకాలతో...): - అంకాల సోమయ్య -దేవరుప్పుల -జనగామ -9640748497

చుక్కాని లేని నావకు

ఉత్తమసరంగు నా దోస్త్ 

ఇప్పటి నా జీవితానికి 

దిశాదశావాడే

మా అమ్మలాగ వాడు

నా కళ్ళలోకే చూసేటోడు

ఏదో బాధలో ఉన్నావని 

నువ్వు తిన్నవాలేదా 

అని విచారించేటోడు 

ఉండి లేని కాపురాలు మావి

వాడు మంచి శ్రీమంతుడు

ఎట్లగలిసిండో వాడు

తనువులు వేరైనా ఆత్మ ఒక్కటే అన్నట్టుగా 

వాడితోనుంటే

కష్టమేదైనా దూదిపింజలా తేలికయ్యేది

ఎప్పుడు నవ్వుతూ ఉండాలని 

హితబోధ చేసేటోడు

చిరునవ్వు తన ముఖాన చెదరనీయనోడు

ఎన్ని బుద్ధిమాటలు చెప్పేటోడో

బ్రతుకుపాఠమంతా వల్లెవేయించేటోడు

దోస్త్ మేరా దోస్త్ 

మనమా నింగిలో చందమామలా వెలగాలనేటోడు

మనదారెప్పుడు రుజువైనదై ఉండాలనేటోడు

విలువలే ఆస్తిపాస్తులు అనేటోడు

కష్టసుఖాలు జంటపదాలేతప్పా

జీవన పర్యంతం అవి మనతో ఉండవనేటోడు

ఆ పక్షుల్లా స్వేచ్ఛగా సంచరించాలనేటోడు

ప్రకృతిని చూసి పరవశించాలనేటోడు 

పాడుచేయోద్ధని హితబోధ చేసేటోడు 

ఎన్నో సుద్ధులు బుద్ధులు నేర్పి

బ్రతుకు నడిమిట్లనన్ను

కాటగలిపిపోయాడునేస్తం

 

ఎక్కడని నేను నిన్ను వెతకనూ 

నా జ్ఞాపకాల్లో సజీవమైన దోస్త్ 

ఒక్కో యాది నాలో ఒలపోతైపోయే

నా పుట్టెడు దుఃఖాన్ని నేనెరితో పంచుకోను 

నన్ను ఓదార్చే నువ్వే నాకు చెప్పాపెట్టకుండా వెళ్లిపోతే

నేనెవరిని అడిగేది

ఆపాపకారి దేవుడు మనకు పాపమే చేసిండు

ఎంతో ప్రాణానికి ప్రాణంగా ఉన్న ప్రాణ స్నేహితుల్లో ఒక్కరిని దూరం చేసి

పాపమే మూటగట్టుకుండు

భూమిపై సకలమానవకోటి ఉన్నంతకాలం 

మన స్నేహం వర్థిల్లుతుంది