కనకాంబరాల కమల:- డా.కందేపి రాణీప్రసాద్

 హలో పిల్లలూ!  కనకాంబరాలు, బంతులు, పీస్‌ లిల్లీలు, గుల్ మోహర్లు, నూరు వరహాలు, కొబ్బరి పిందెలు, చింత గింజలు చాలా చెట్లకు సంబంధించిన పూలు, కాయలు, పూల మధ్యలో కేసరాలు వాడాను. దీనితో పాటుగా మంచినీళ్ళు తెచ్చుకునే వాటర్ బబుల్స్ మూతలు కూడా వాడాను. మేం బెంగుళూరులో ఉన్నప్పుడు ఇంటికి వాటర్ క్యాన్స్ వచ్చేవి. వాటి మూతలు, మూతల క్రింద ఉండే రింగులు దాచేదాన్ని. వాటితో బొమ్మలు చేయాలనుకున్నాను. ఒక రోజు కనకాంబరాల అమ్మాయిని చేయాలనుకున్నప్పుడు ఈ మూతలు, రింగులు కన్పించాయి. ముఖం, శరీరం రింగులతోనే చేశాను. కనకాంబరాలు అకాంథేసి కుటుంబానికి చెందిన మొక్క ‘‘ క్రోసాండ్రా ఇన్‌ఫండి బ్యొలి ఫార్మిస్’’ అనేది కనకాంబరాల శాస్త్రీయ నామం. ఇది శ్రీలంక దేశానికి చెందిన మొక్క. పువ్వులు పగడాల్లా ఒక గుత్తిలా కాస్తాయి. ఒక్కొక్క గుత్తిలో పది పన్నెండు పువ్వులు ఉంటాయి. ఉష్ణ మండల ప్రాంతాలలో పెరుగుతుంది. ఇవి ఎరుపు, పసుపు, నారింజ, నేరేడు వర్ణాలలో లభిస్తాయి. ఏప్రిల్ నుంచి అక్టోబర్ వరకు కనకాంబరాలు కాస్తాయి. ఇళ్ళల్లో ఎక్కువగా పెంచుతారు. హెర్భల్ వైద్య విధానంలో దగ్గు, అల్సర్ వంటి వైద్య చికిత్సలకు వాడతారు.
ముఖం లాగా రింగులను గుండ్రంగా అమర్చి దానిలో బంతి పూలను పెట్టాను. మరికొన్ని రింగులను పావడా వలె అమర్చాను. వీటిలో గుల్ మోహర్ పూలు పెట్టాను. పావడా క్రింది వైపు క్యాన్ల మూతలు పెట్టాను.ఇప్పుడు రెండు రింగులను చేతులుగా వాడుకున్నాను. ఎండు పుల్లల్ని చేతులుగా పెట్టాను. కనుబొమ్మలుగా పీస్ లిల్లీ కేసరాలు పెట్టి, కళ్ళుగా చింతగింజల్ని పెట్టుకున్నాను. పెదవులుగా కొబ్బరి పిందెల తొక్కల్ని పెట్టాను. పావడా మొత్తాన్ని కనకాంబరాలు, గుల్ మోహర్లు, కొబ్బరి పిందెలు చల్లాను. తలలో పెద్ద కనకాంబర మాలను పెట్టాను. చెవులకు లోలాకులు పెట్టాను.