తాటి ముంజల తార: - డా. కందేపి రాణీప్రసాద్

 హలో పిల్లలూ! ఇప్పుడు వేసవి కాలం కదా! తాటి ముంజలు తింటున్నారా!   చల్లగా మెత్తగా చాలా బాగుంటాయి కదా! తాటి కాయల లోపల మెత్తగా జున్నులా అమరి ఉంటాయి. తాటి ముంజల్ని ‘‘ఐస్ యాపిల్స్’’ అంటారు. వేసవి ఎండల్లో వచ్చే నీరసాన్ని, నిస్తేజాన్ని తగ్గిస్తుంది. ఈ కాలంలో శరీరం చల్లగా ఉండాలంటే వేసవి తాపాన్ని భరించాలంటే కొబ్బరి నీళ్ళు, పుచ్చకాయలు, తాటి ముంజలు, నిమ్మ రసం వంటివి తాగటం ఎంతైనా అవసరం. తాటి చెట్లు ‘‘పామేసి’’ కుటుంబానికి చెందిన చెట్లు. ‘‘బోరాసస్’’ ప్రజాతికి చెందిన చెట్లు. ఆసియా, ఆఫ్రికా, మడగాస్కర్, న్యూగినియాలలో తాటి చెట్లు ఎక్కువగా పెరుగుతాయి. తాటి కాయలతో మూడు చక్రాల బండి తయారు చేసి ఆడుకునే వాళ్ళు. ఆడ పిల్లలైతే తాటి విత్తనంతో, పీచుతో బొమ్మలు చేసే వాళ్ళం.  తాటి ముంజల్లో నీటి శాతం అధికంగా ఉంటుంది. ఇది తినడం వలన బరువు తగ్గుతారు. ఎండ దెబ్బ కొట్టకుండా తాటి ముంజలు కాపాడతాయి. కొబ్బరి ముక్కలాగా తీపిగా ఉంటుంది.
నేను తాటి ముంజలతో ఆడ పిల్లను తయారు చేశాను. తాటి ముంజల్ని తినేశాక తొక్క మిగిలింది. ఈ తొక్కతోనే ఏమైనా చేద్దామా అని ఆలోచించి, ఒక అమ్మాయి రూపం కల్పించాను. కుచ్చులు కుచ్చుల లంగా కుట్టాను. కళ్ళు, ముక్కు, నోరు కూడా తాటి ముంజల తొక్కతోనే పెట్టాను. తాటి ముంజల తొక్కతో అందమైన ఆడ పిల్ల తయారయింది. నేనీ తొక్కతో తొలిసారిగా చేసిన బొమ్మ ఇది.