నేననుకున్నది సాధించేనా?: - ఆచార్య అయ్యలసోమయాజుల ప్రసాద్-సెయింట్ లూయిస్-అమెరికా

ఉత్తమ అధ్యాపకునిగా

నైతిక విలువలను చదువుతో పాటు చెప్పేనే

చెడు వ్యసనాలకు లోనైన పిల్లలను సన్మార్గంలో పెట్టేనే

కడుపున పుట్టిన పిల్లలకు నేను తిన్నా తినకపోయినా

ఆకలి తీర్చి 

అక్షరం ముక్క వస్తే అన్నం దొరుకుతుందని

ఉన్నత విద్యలు చదివించేనే

కట్టు, బొట్టు వేషధారణ మృదు భాషణం లింగ వివక్షత లేకుండా ఉండాలన్నానే

శరీరం బుద్బుధమని చెప్పి

ఉన్నంతలో పేదలకు సహాయ పడాలన్నానే

అసూయ, ద్వేషాలు మాని

ప్రేమానురాగాలను అందరికి పంచాలన్నానే

నలభై సంవత్సరాలు విద్యతో బాటు విద్యార్థులకు

జన్మనిచ్చిన పిల్లలకు  ఆచరించి బోధించిన  నేను 

పెద్దవారై నేడు వారు ప్రవర్తిస్తున్న తీరు చూసి అడిగితే మాష్టారు అవన్నీ

మాటలకే పరిమితం చేతలకి కాదు క్షమించండి అన్న వేళ అనుకున్నా

నేననుకున్నది సాధించానా?

..............................