కొబ్బరి పీచు కోకిల: -డా. కందేపి రాణీప్రసాద్

 

హలో పిల్లలూ! మీరు కొబ్బరి పీచును చూశారా! పూర్వకాలంలో కొబ్బరి పీచుతో అంట్లు గిన్నెలు తోముకునేవారు. శుభ్రంగా తోముకోవచ్చు. పొరపాటున గిన్నెల సందుల్లో కొద్ది పీచు ఇరుక్కున్నా సమస్యలు రావు. ఇప్పుడు స్టీల్ పీచుతో తోముకుంటున్నారు. మూకుళ్ళ హ్యాండిల్స్ వద్ద ఇరుక్కుంటే కూరల్లో పడిపోతే ఎంత ప్రమాదం జరుగుతుంది. కొత్తగా ఎన్ని రకాల స్ర్కబ్బర్లు వచ్చినా కొబ్బరి పీచును దాటలేకపోయాయి. నేనివాళ కొబ్బరి పీచుతో అమ్మాయిని సృష్టించాను. నా చిన్నతనంలో కొబ్బరి చెట్టు వ్యర్ధాలతో పడవలు, పూలు, ఇళ్ళు, రకరకాల కళాఖండాలు మా నాన్న, అన్నయ్యలు సృష్టించేవారు. నేను కూడా చాలానే చేశాను. అమ్మాయి బొమ్మనైత ఇదే తొలిసారిగా చేస్తున్నాను. దీని శాస్త్రీయ నామం ‘‘కోకాస్ న్యూసిఫెరా’’. ఇది ‘‘పామే’’ కుటుంబానికి చెందిన ‘‘ఆరికేలిస్’’ క్రమానికి చెందింది. ఈ చెట్టు సుమారు 100 అడుగుల వరకు పెరుగుతుంది. ఏడు సంవత్సరాల వయస్సు నుంచీ పూతలు పూస్తూ, కాయలనిస్తూ ఉంటాయి. దీనిని ‘‘కల్ప వృక్షం’’ అంటారు.  కావలసిన ఆహారాన్ని, నిత్యావసర వస్తువుల్నీతలదాచుకునే చోటునీ ఇస్తుంది. పూజలలో, పెళ్ళిళ్లల్లో, శుభ కార్యాలలో కొబ్బరి ఆకులకు, కొబ్బరి కాయకు ప్రథమ స్థానం ఇస్తారు. కొబ్బరి బొండాంలోని నీళ్ళకు చాలా పౌష్టిక విలువలు ఉంటాయి. ఈ నీళ్ళల్లో గ్లూకోజ్‌తో పాటు పోటాషియం, సోడియం లాంటి ఖనిజాలు ఉంటాయి. కొబ్బరికాయలో నీరు, కండ, గట్టి పెంకు ఉంటాయి. ఈ నీళ్ళను నెలరోజులున్న శిశివుకు కూడా ఇవ్వవచ్చు. సులభంగా జీర్ణమవుతుంది. స్త్రీ పుష్పాలు ఆకుపచ్చ రంగులో, పురుష పుష్పాలు మీగడ రంగులో ఉంటాయి. కొబ్బరికాయను కొట్టడం ఆత్మ సమర్పణగా భావిస్తారు.
కొబ్బరి పీచును గుండ్రంగా చిన్నచిన్నవృత్తాలుగా చేశాను. వీటిని తల భాగంలో అమర్చాను. శరీరం, కాళ్ళు, చేతులు అమర్చాను. తలకు రింగుల జుట్టు పెట్టాము. కళ్ళు, ముక్కు, నోరుకు ఫ్లాస్టిక్ మూతల్ని పెట్టాను. షర్టుకు గుండీలు పెట్టాను. ఈ కోకిలకు జుట్టు బాగా రేగుతోంది. అయినా రింగుల జుట్టు కోకిల అందంగా ఉన్నది.