చేతులు కలుపు!స్నేహం నిలుపు! : - డా పివిఎల్ సుబ్బారావు.- విజయనగరం.

మనసుపెట్టి చేసే ,

             కరచాలనాలు! 

పరస్పర ఆలింగనాల,

          సరి లాంఛనాలు !

  మౌనప్రవచనాలు, 

        మనోసాంత్వనాలు! 

పరస్పర విద్వేషాల ,

               స్వస్తి వాక్యాలు!

వింత కరచాలనం,

      కలియుగ నిదర్శనం!

 ఓ చేయని మరో చేయి,

   ఏం చేస్తుందో సందేహం! 

కుందేలు కాలు ,పులి పంజా,  

           భయ సంబంధం! 

ఘటోత్కచ హస్తం 

 ఉత్తరకుమార భయోత్పాతం!

చేతుల వేళ్ళు సున్నితంగా,

              ఒకటవ్వాలి!

ఇరు హృదయాలను ,

         సన్నితం చేయాలి !

చెలిమి కలిమి పాదుకు ,

             నీరు పోయాలి!

 బలిమి భావాలన్నీ ,

              తుడిచి పెట్టాలి!

పూలకి కంటకాలు ,

           ఆటంకాలు కావు !

కంటకాలు పూలకి ,

             రక్షణ కవచాలు!

 దుర్మార్గానికో అవకాశం,

   సన్మార్గంతో సాహచర్యం !

సన్మార్గంతో చేరి దుర్మార్గం,

     నేర్వాలి సాధు జీవనం!

మంచి స్నేహం,

             చెడు ద్రోహం!

 మంచి పెంచు ,

     చెడు తలవంచు !

 చెడు దౌర్జన్యం 

       మంచి సౌజన్యం; 

మంచి వెలుగై విజయం,

      చెడు చీకటి మాయం!

_________