గునుగుపూల గుమ్మ: - డా. కందేపి రాణీప్రసాద్

 హలో పిల్లలూ! గునుగు పూలతో బతుకమ్మను తయారు చేస్తా కదా! బతుకమ్మ పండుగ సంబరాలలో గునుగు పూలకు రంగులు వేసి అందంగా అలంకరిస్తాం కదా ! నేనిప్పుడు గునుగుపూలతో అమ్మాయిని తయారు చేశాను. మా ఇంటి కుండీలలో ఎవరూ వేయకుండానే గునుగు పూల చెట్లు మొలిచాయి. అలాగే సీతమ్మ వారి జడల పూల చెట్లు కూడా మొలిచాయి. పెద్ద పెద్ద సీతమ్మ జడ ముద్దులు పూశాయి. గునుగు పూలేమో మేడను అందుకోవాలన్నట్లుగా పోడుగ్గా కాశాయి. ఇందులో బంతుల్ని కూడా వాడాను. అలాగే ఆసుపత్రి వ్యర్థాలైన ప్లాస్టిక్ ఇంజెక్షన్ దూతలు సైతం ఉపయోగించాను. కొంతమంది గునుగు చెట్ల ఆకుల్ని ఆకు కూరగా వాడుకుంటారు. ఇది గడ్డి జాతికి చెందిన మొక్క అందుకే దీని పూవులు ప్లాస్టిక్ వలె కనిపిస్తాయి. కేరళ రాష్ట్రంలో అలప్పుజా, కాసరగాడ్, మలప్పురం, పాలక్కాడ్, కన్మూర్, కోజిక్కోడి జిల్లాలలో ఎక్కువగా కనిపిస్తుంది. నేను కేరళలోని ఈ జిల్లాలన్నీ తిరిగి చూశాను. గునుగు పువ్వును ఇంగ్లీషులో " సిల్వర్ స్పైక్‌డ్ కాక్స్ కాంబ్ " అని అంటారు. మలయాళంలో చెరువిరా అనీ, తమిళంలో పన్నైపూ, మాకిలిక్కరై అనీ పిలుస్తారు.
 ఇంజెక్షన్ మూతలతో పాపాయి శరీరాన్ని సృష్టించాను. ఈ పాపకు గునుగు పూల లెహంగా కుట్టాను. బంతి రెక్కల బ్లౌజు వేశాను. సీతమ్మ వారి జడలు లెహంగా కింద బార్డర్ వలె కుట్టాను. బ్లౌజుకు గునుగు పూల నూకను అక్కడక్కడా చల్లాను. బ్లౌజ్ చేతులకు బిళ్ళ గన్నెరు కుచ్చులు పెట్టాను. రెండు జడలు పైకి కట్టుకొని ఆకుపచ్చ రిబ్బన్లు వేసుకున్నది.