చెడు అలవాట్లు జీవితానికి చేటు:- చిన్నోళ్ళ ప్రవల్లిక 7వ తరగతి , ప్రాథమికోన్నత పాఠశాల అంబం, ఎడపల్లి, జిల్లా: నిజామాబాద్

 

చెడు అలవాట్లు మొదట్లో సరదాగా అనిపించినా, అవి మెల్లగా మన జీవితాన్ని ఎలా నాశనం చేస్తాయో వివరిస్తూ రాసిన కథ ఇది.
మా ఊరిలో వంశీ అని ఒక అబ్బాయి ఉండేవాడు. వంశీకి ఆటలన్నా, పాటలన్నా చాలా ఇష్టం. చదువులో కూడా తను చాలా చురుకుగా ఉండేవాడు. కానీ, ఎనిమిదో తరగతికి రాగానే వంశీకి కొంతమంది కొత్త స్నేహితులు పరిచయమయ్యారు. వాళ్లు ఎప్పుడూ బడికి వెళ్లకుండా సినిమా కబుర్లు చెప్పుకుంటూ, ఊరి చివర చెట్ల కింద కూర్చునేవాళ్లు. వంశీకి కూడా వాళ్లతో ఉండటం సరదాగా అనిపించింది. మెల్లగా వాళ్లతో కలిసి బడి ఎగ్గొట్టడం మొదలుపెట్టాడు. వాళ్లు సిగరెట్లు తాగడం, సెల్‌ఫోన్‌లో చెడు వీడియోలు చూడటం వంటి అలవాట్లు చేసేవారు. మొదట వంశీ భయపడ్డాడు, కానీ “నువ్వు మా స్నేహితుడివి అయితే ఇవన్నీ చేయాలి, అప్పుడే నువ్వు హీరోవి అవుతావు” అని వాళ్లు రెచ్చగొట్టారు. ఆ మాటలు నమ్మి వంశీ కూడా చెడు అలవాట్లకు బానిసయ్యాడు. చెడు అలవాట్లు మొదలయ్యాక వంశీలో చాలా మార్పులు వచ్చాయి. ఎప్పుడూ నవ్వుతూ ఉండే వంశీ, ఇప్పుడు చిన్న చిన్న మాటలకే అమ్మ మీద, నాన్న మీద కోప్పడేవాడు. అబద్ధాలు చెప్పి ఇంట్లో డబ్బులు దొంగిలించడం మొదలుపెట్టాడు. చదువు అటకెక్కింది, పరీక్షల్లో ఫెయిల్ అయ్యాడు. వంశీ ఆరోగ్యం కూడా పాడైపోయింది. ఎప్పుడూ నీరసంగా ఉండటం, కళ్లు ఎర్రగా మారడం గమనించిన వాళ్ళ నాన్న చాలా బాధపడ్డారు. “బాబూ! ఈ అలవాట్లు నీ జీవితాన్ని చీకటి చేస్తాయి, మార్చుకో” అని బతిమాలారు. కానీ వంశీకి తన స్నేహితుల మాటే వేదవాక్కులా అనిపించింది. ఒకరోజు వంశీ తన స్నేహితులతో కలిసి బైక్ మీద అతివేగంగా వెళ్తూ ప్రమాదానికి గురయ్యాడు. మిగతా వాళ్ళు తప్పించుకున్నారు కానీ, వంశీ కాలు విరిగి హాస్పిటల్ పాలయ్యాడు.

హాస్పిటల్ బెడ్ మీద ఉన్నప్పుడు వంశీకి ఒక విషయం అర్థమైంది. తను హీరోలు అనుకున్న స్నేహితులు ఒక్కరు కూడా తనను చూడటానికి రాలేదు. తన కోసం రాత్రంతా మేలుకుని ఏడుస్తూ సేవలు చేస్తున్నది తన తల్లిదండ్రులే. తను దొంగిలించిన డబ్బులు, అబద్ధాలు అన్నీ గుర్తొచ్చి వంశీకి చాలా సిగ్గుగా అనిపించింది. అప్పుడు వాళ్ళ నాన్న దగ్గరకు వచ్చి ఒక చిరిగిన గాలిపటాన్ని చూపించారు. చూడు వంశీ! గాలిపటం ఆకాశంలో ఎగురుతున్నంత సేపు అందంగా ఉంటుంది. కానీ దానికి చెడు గాలి తగిలినా లేదా దారం తెగి ముళ్ళ కంపలో పడినా, అది ఇలాగే చిరిగిపోతుంది. నీ జీవితం కూడా ఒక అందమైన గాలిపటం లాంటిది. చెడు అలవాట్లు అనే ముళ్ళ కంపలో పడి నీ జీవితాన్ని పాడు చేసుకోకు” అన్నారు. వంశీకి కళ్లు తెరుచుకున్నాయి. తను చేసిన తప్పులకు క్షమాపణ కోరాడు. హాస్పిటల్ నుండి డిశ్చార్జ్ అయ్యాక, ఆ పాత స్నేహితులకు దూరంగా ఉన్నాడు. మళ్ళీ పుస్తకాలు పట్టుకున్నాడు. పోగొట్టుకున్న ఆరోగ్యాన్ని, పేరును తిరిగి సంపాదించుకోవడానికి రెట్టింపు కష్టపడ్డాడు.
చెడు అలవాట్లు అనేవి తేనె పూసిన కత్తి లాంటివి. పైన తీపిగా ఉన్నా, లోపల మన ప్రాణాలనే తీస్తాయి. మనం ఎంచుకునే స్నేహితులు, మన అలవాట్లే మన భవిష్యత్తును నిర్ణయిస్తాయి.
నీతి: చెడు అలవాట్లు జీవితానికి చేటు - మంచి అలవాట్లే ప్రగతికి బాట.