తలగడ నేస్తం.: - పాలగుమ్మి జ్యోతి.

విరహంలో ప్రియురాలై నలిగి నీరసపడ్డ సుకుమారి! 

విరసంలో శరములా దూసుకొచ్చే కయ్యాలమారి! 

విషాదంలో కన్నీటి మూగ గాధలు ఆలకించే సహోదరి!

నిద్రాదేవికి స్వాగతం పలికే రాకుమారి! 

రంగుల స్వప్నలోకాలకి తీసుకెళ్ళే సొగసరి ! 

వర్ణ వర్ణాల,పువ్వుల  గలీబులు తొడిగిన సింగారి!

సోఫాలెక్కిన సోయగాలు!

దివాన్ల పైన దర్జాలు!

ఖవ్వాలి ప్రదర్శనలో హొయలు!

వృద్ధుల కాళ్ల నొప్పులు తగ్గించే సాధనాలు! 

లాప్టాప్ ల బరువులు మోస్తూ...

పిల్లలు విసిరే బంతిలా ఆటల్లో ఉత్సాహ పరుస్తూ.. 

చరవాణిని తిలకించే లలన ఎదపొంగులుతాకి మురుస్తూ...

పాపల నిదురలో ఇరువైపులా బంటులా కావలికాస్తూ..

భయపడే బుజ్జాయిలను గుండెలకు హత్తుకొని భరోసానిస్తూ..

తలగడ నేస్తమా!

ఆత్మీయ బంధమా!

నిను వీడుట సాధ్యమా!