రాక్షస కొండ అరటి: - - యామిజాల జగదీశ్

 న్యూ గినియా ఎత్తైన పర్వత ప్రాంతంలో వర్షారణ్యాల్లో మనల్ని ఆశ్చర్యపరిచే ఒక భారీ అరటి రకం పెరుగుతోంది — ఆ అరటి చెట్టు పేరు మూసా ఇంజెన్స్ (Musa ingens). దీన్నే రాక్షస కొండ అరటి అంటారు! 
ఈ అరటి చెట్టు సుమారు 20 మీటర్ల ఎత్తు పెరుగుతుంది! దాంతో ఈ చెట్టు మామూలు అరటి మొక్కల కాకుండా, అచ్చంగా ఓ పెద్ద చెట్టులా కనిపిస్తుంది. సముద్ర మట్టానికి సుమారు 1,200 నుండి 1,800 మీటర్ల ఎత్తులో ఉండే చల్లని, తేమతో కూడిన కొండవాలు ప్రాంతాలలో ఇది బాగా పెరుగుతుంది.
అరటి గెల కూడా చాలా పెద్దదే! ఒక్క అరటి గెలా సుమారు 60 కిలోల బరువు ఉంటుంది. ఒక్కో పండు 25–30 సెంటీమీటర్ల పొడవు దాకా పెరుగుతుంది!
అయితే ఇందులో ఒక ఆసక్తికరమైన విషయం ఉంది. ఇంత పెద్ద పండు అయినా సరే, ఇది మనం మామూలుగా తినే తీయటి అరటిపండు కాదు. లోపల గుజ్జు పిండిలా ఉండి, పెద్ద పెద్ద గింజలు ఉంటాయి. అందుకే దీన్ని పచ్చిగా తినడం కన్నా వండుకుని తినడానికే బాగా పనికొస్తుంది. 
ఈ మూసా ఇంజన్స్ అరటి చెట్టు పెరగాలంటే న్యూ గినియా కొండల్లాంటి చల్లటి, తేమతో కూడిన వాతావరణం కావాలి. అదనంగా, మనం వాడుకునే మామూలు అరటి రకాల కంటే ఇది పెరిగి పండు ఇవ్వడానికి చాలా ఎక్కువ సమయం తీసుకుంటుంది.
అందుకే దీన్ని పెద్ద ఎత్తున వ్యవసాయం చేయడం అంత సులువు కాదు. ఈ అద్భుతమైన మొక్క తన సహజమైన కొండ ప్రాంతాలనే సురక్షితంగా ఉండటానికి ఇది ఒక కారణం. 
అరటి చెట్టు అంటే చిన్నదే అని మీరు అనుకుంటే... ఈ రాక్షస అరటి ఆ ఆలోచననే మార్చేస్తుంది!