వరలక్ష్మీ మాతా!: - వరలక్ష్మి యనమండ్ర

పల్లవి

వరలక్ష్మీ మాతా... కరుణామృత దాతా 

కమలాసన వాసినీ... కైవల్య ధాత్రీ

శ్రీకర చరణములే... శరణాగతి మాకు

మంగళదాయినీ... మము కరుణించవే

చరణం – 1

పద్మదళ నేత్రీ... పరమపావన గాత్రి

పరమేశ్వర ప్రియసఖి... పరమశుభనేత్రి

పసిడి కాంతులతో పరివేష్టిత రూపిణి

భక్తహృదయ మందిరాన కొలువైన రాణీ 

ధనధాన్య సౌభాగ్య సమృద్ధిని ప్రసాదించి

ధరణిపై మా గృహమున శ్రీనిధివై నిలువవే

చరణం – 2

కమలాలయే... కళ్యాణ గుణనిలయే

కల్మష వినాశినీ... కరుణారస హృదయే

మంగళ వాద్యముల మధురనాదముల మధ్య

మహిత భక్తితో నిన్ను కొలిచెదమమ్మా

అష్టైశ్వర్యములందించి అనుగ్రహించవే

అనుదినము జీవితమున ఆనందం నింపవే

చరణం – 3

శ్రీచక్ర నివాసినీ... శుభదాయినీ తల్లీ

శరణాగత వత్సలే... శాంతి ప్రదాయినీ

నీ దివ్య కటాక్షమే మా జీవన సౌభాగ్యం

నీ పాదసేవయే మా జన్మకు సాఫల్యం

వరములే వర్షముగా కురిపించవే తల్లీ 

వరలక్ష్మీ దేవీ... మా ఇంట ఉండు తల్లీ