వరలక్ష్మీ స్తుతి. (పద్యములు ): - టి. వి. యెల్. గాయత్రి.-పూణే. మహారాష్ట్ర.

1.

మత్తేభము.

వరలక్ష్మీయని పిల్చినంత గరిమన్ భాగ్యంబునందింతువే!

సిరివై నిల్తువు భక్తవాహినికి సంశ్రేయంబు చేకూర్చుచున్

గరుణావార్ధివి నీదు నోము సలుపన్ కామ్యంబు లీడేర్చునిన్ 

స్థిరమౌ చిత్తము తోడ గొల్తు జననీ!చింతల్ తొలంగించుమా!//

2.

శార్దూలము 

శ్రీ వైకుంఠనివాసినీ!హరిసఖీ!శ్రీలన్ బ్రసాదించుచున్

దేవీ!ధారుణి నేలు చుందువుకదా!దీనార్తి సంహారిణీ!

సేవింతున్ రమ!భక్తియుక్త నగుచున్ జిత్తంబునన్ నిల్వుమా!

కైవల్యంబును గోరి నీ సరసనే కైమోడ్చి నిల్తున్ శుభా!//

3.

మత్తేభము.

హరికిన్ పట్టపు రాణివై జగతికై యానాంద సంధాయివై 

సిరివై భాగ్యము లిచ్చి కాచెదవు సౌశీల్యంబుతోన్ దల్లివై 

తిరుచానూరున గొల్వుతీరి రమవై చింతామణీ భాతివై 

పరమున్ జూపెదవమ్మ!భక్తతతికిన్ బ్రార్థింప నిన్ శుద్ధతన్.//

4.

మత్తేభము.

మునులున్ యోగులు సాధనల్ సలుపుచున్ పుణ్యాత్ములై మెల్గుచున్ 

బ్రణతిన్ దల్పగ దర్శనంబు నిడుచున్ బ్రాపున్ బ్రసాదింతువే!

విరసం బేటికి చూపుచుందువకటా!ప్రీతిన్ గటాక్షించి నన్ 

దరహాసంబును జిల్కిసాకుకొనుమా!తల్లీ!జగద్రక్షకీ!//