తరువులు కాలానికి తోరణాలు కడుతున్నాయా: - బి.ఉషారాణి- Govt టీచర్-మంచిర్యాల

ఎదురెదురుగా నిలిచిన

తరువులు తమ కొమ్మలతో

కాలానికి స్వాగత తోరణాలను

ప్రేమతో కడుతున్నాయా

సముద్రం తనలో ఎగసిపడుతున్న

అలలను చూసి మురిసిపోతుంటే

ఆకాశం మేఘాలను తన కలలకు

రూపంలా అందంగా మలుస్తోందా

పూలు పరిమళించి

తుమ్మెదలను ఆహ్వానిస్తుంటే

చిన్ని నీలి పిట్టకు

చిత్రంగా తోస్తోందా

చల్లని గాలి

పూల రేకులను ముద్దాడుతూ

ప్రకృతి గుండెలో దాగిన

రాగాలను ఆలపిస్తోందా

పచ్చని నేల

పూల పాదాలకు పాన్పై

ప్రతి అడుగునూ

ఆనందంతో అలంకరిస్తోందా

ఈ అందాల విందులో

మౌనం కూడా మాటలై

ప్రతి దృశ్యం

ఒక కవితగా మారుతోందా

అందుకేనా...

ప్రకృతి మాట్లాడకపోయినా

వినగల మనసులో మాత్రం

వేల భావాలను మొలకెత్తిస్తుంది