ఇది యాపారం!: - కొత్త విరిత

 ఆరోగ్యంగా ఉండాలంటే పొద్దున్నే ఫలానా జ్యూస్ తాగాలట… రక్తం పెరుగుతుందట! ఫలానా బ్రాండ్ ఖర్జూరం తింటే బీపీ పెరగదట! వీట్‌గ్రాస్ జ్యూస్ తాగితే హార్ట్‌ఎటాక్ రాదట! ఇంకో పొడి కలిపి తాగితే ఒంట్లో రోగాలన్నీ మాయమైపోతాయట! ప్రకటనలు చూస్తుంటే ఆరోగ్యం ఆసుపత్రిలో కాదు, అంగడిలో దొరుకుతున్నట్టుంది! ఇది తింటే అదొస్తాది… అది తాగితే ఇంకోటొస్తాది! ఏది తిన్నా ఏదో ఒక జబ్బు వస్తుందనే భయం మాత్రం ఉచితం! ఒకరు రక్తం పెంచుతామంటారు, మరొకరు రోగనిరోధక శక్తి పెంచుతామంటారు. ఇంకొకరు గుండెకు రక్షణ అంటారు… అసలు వైద్యశాస్త్రమే వాళ్ల ప్యాకెట్లలో ఉన్నట్టుంటుంది! మనిషి భయాన్ని గుర్తించడం ఒక కళ… ఆ భయాన్ని అమ్ముకోవడం ఒక వ్యాపారం! ఆరోగ్యం మీద ఆశ చూపించి, జబ్బుల మీద భయం పెంచి,చివరికి జేబులకు చిల్లులు పెట్టడం వీళ్ల వ్యాపార సూత్రం! వాళ్లు చెప్పినవన్నీ కొంటే ఆరోగ్యం వస్తుందో లేదో తెలియదు కానీ, ఖర్చులు మాత్రం ఖచ్చితంగా పెరుగుతాయి,షాపువాడికి మాత్రం బిజినెస్ వస్తుంది! 
మన ఆరోగ్యం ఎలా ఉన్నా, వాళ్ల "అమ్మకాలు మాత్రం ఆరోగ్యంగానే" ఉంటాయి! 
ఇదంతా ఆరోగ్యమో, ఆందోళనో తెలియదు కానీ… షాపు వాడికి మాంచి యాపారమే కదా!