స్టేటస్ ...!!*:- --డా.కె .ఎల్వీ

నిన్న -మొన్నటి వరకూ 

నడి వయస్సులో 

ఉన్నట్టే ఉంది నాకు !

వయసు మరచిపోయి 

వ్యధలకు మనసులో 

చోటివ్వక ..చొర నివ్వక 

చలాకీగానే నడిచిపోయింది 

బ్రతుకు బండి !

చీకు ..చింతలను 

దరిచేరనివ్వక  .....

కష్ట సుఖాలను సమానంగానే 

స్వీకరించి ముందుకు నడిచాను !

నా కళ్ళముందు 

ఎదుగుతున్న 

నా పిల్లలకు 

వయసును బట్టి 

జరగాల్సినవన్ని 

జరిపిస్తూనే ఉన్నాను .

కానీ .......

నా వయసు గురించి 

నేనెప్పుడూ ఆలోచించ లేదు !

ఉద్యోగపర్వానికి ,

చివరి సంవత్సరం 

చివరి మాసం 

చిట్ట చివరి దినం 

సమీపించినప్పుడు ,

'ఓహో ..!అప్పుడే నాకు -

యాభై ఎనిమిదా '

అనుకున్నాను ! అయినా ,

నాలో ముదిమి ఆలొచనలు 

మచ్చుకు కూడా 

చోటు చేసు కోలేదు !

కానీ .....

నడి రోడ్డు మీద 

ఓ ..ఆగంతకుడు ..

'ఓ ..ముసలాయనా ..! '

అని ,పిలిచినప్పుడు ,

నాలొ తెలీకుండానే 

వృద్దాప్యపు ఛాయలు 

వంటినిండా ఆల్లుకుని 

నా స్టేటస్ నాకు 

గుర్తు తెచ్చాయి !!